សំណួរដែលសួរជារឿយៗ

“សំណួរដែលសួរញឹកញាប់ (FAQs) អំពីច្បាប់ស្តីពីកិច្ចការពារអ្នកប្រើប្រាស់”

1. តើច្បាប់ស្ដីពីកិច្ចការពារអ្នកប្រើប្រាស់ត្រូវបានអនុម័តនៅពេលណា និងមានគោលបំណងចម្បងអ្វី?

ចម្លើយ៖ ប្រទេសកម្ពុជាជាសមាជិកអាស៊ានចុងក្រោយ ដែលបានអនុម័តច្បាប់ស្តីពីកិច្ចការពារអ្នកប្រើប្រាស់ ហើយច្បាប់នេះត្រូវបានអនុម័តនៅថ្ងៃទី២ ខែវិច្ឆិកា ឆ្នាំ២០១៩ គោលបំណងចម្បងនៃច្បាប់នេះគឺ ១. “ធានាឱ្យមានកិច្ចការពារអ្នកប្រើប្រាស់​” ​ពីអំពើនិងការអនុវត្តមិនសុចរិតដែលធ្វើដោយបុគ្គលធ្វើធុរកិច្ច ដោយមានការរៀបចំជាក់លាក់មួយ ក្នុងគោលបំណងស្វែងរកប្រាក់ចំណេញពីសកម្មភាពធុរកិច្ចនោះ។ ២. “លើកកម្ពស់ការប្រកួតប្រជែងដោយសុចរិត”  រវាងបុគ្គលទាំង​ឡាយ​​​​ដែល​​ធ្វើ​សកម្មភាព​​ធុរកិច្ចដោយប្រាកដថា បុគ្គលទាំងនោះប្រកួតប្រជែងគ្នាដោយឈរ​​លើមូលដ្ឋាន​តម្លៃ​ទាប គុណ​ភាពល្អ​ និង​សេវា​​ល្អ​ ក្នុង​រយៈពេល​យូរអង្វែង​ដោយ​ផ្អែក​លើគោល​ការណ៌​​​​និរន្តភាពផ្នែកសេដ្ឋកិច្ច និង​ដោយ​មិនបំពាន​​​លើការប្រើប្រាស់​អំណាច​ឬជំហរឯកាធិភាព។

• តើច្បាប់ស្ដីពីកិច្ចការពារអ្នកប្រើប្រាស់មានវិសាលភាពអនុវត្តលើអ្វីខ្លះ?

ចម្លើយ៖ ច្បាប់ស្ដីពីកិច្ចការពារអ្នកប្រើប្រាស់មានវិសាលភាពអនុវត្តលើរាល់សកម្មភាពធុរកិច្ចទាំងឡាយណា​ទោះបីរកប្រាក់ចំណេញក្តី ឬមិនរកប្រាក់ចំណេញក្តី រួមទាំងការលក់ទំនិញ ឬសេវាផ្សេងៗ ឬសិទ្ធិប្រត្យក្សលើអចលនទ្រព្យ អោយអ្នកប្រើប្រាស់។

• នៅក្រោមច្បាប់ស្ដីពីកិច្ចការពារអ្នកប្រើប្រាស់តើសិទ្ធិរបស់អ្នកប្រើប្រាស់​មាន​អ្វីខ្លះ?

ចម្លើយ៖      សិទ្ធិអ្នកប្រើប្រាស់ដែលមានចែងនៅក្នុងច្បាប់ស្តីពីកិច្ចការពារអ្នកប្រើប្រាស់មានដូចជា៖

• សិទ្ធិទទួលបានព័ត៌មាននិងការអប់រំ
• សិទ្ធិក្នុងការជ្រើសរើសទំនិញ ឬសេវា ដែលកំពុងមានការប្រកួតប្រជែងលើតម្លៃ និងគុណភាព
• សិទ្ធិទទួលបានដឹងឮអំពីកង្វល់របស់អ្នកប្រើប្រាស់ និងទទួលបានការពិនិត្យដោះស្រាយពីបញ្ញត្តិករមានសមត្ថកិច្ច និងរាជរដ្ឋាភិបាល
• សិទ្ធិទទួលបានការទាមទារសំណងស្របតាមច្បាប់ស្ដីកិច្ចការពារអ្នកប្រើប្រាស់ និងច្បាប់ផ្សេងៗទៀត។

• តាមច្បាប់​ តើអ្នកប្រើប្រាស់​មាន​សិទ្ធិ​ទាមទារសំណងដែរឬទេ?​ ហើយ​គួរ​ទារ​សំណងនៅពេលណា?​

ចម្លើយ៖       តាមច្បាប់ស្តីពីកិច្ច​ការពារអ្ន​កប្រើប្រាស់ ដូចដែលមានចែងក្នុងមាត្រាទី៤ ចំនុចទី៦ អ្នកប្រើប្រាស់មានសិទ្ធិក្នុងការទាមទារសំណង នៅពេល​ដែល​សិទ្ធិនិងផលប្រយោជន៍របស់ពួកគាត់ត្រូវបានរំលោភ​បំពាន។

• ហេតុអ្វីបានជាចំបាច់ត្រូវបង្កើតគណៈកម្មាធិការជាតិការពារអ្នកប្រើប្រាស់?

ចម្លើយ៖  ហេតុដែលចាំបាច់ត្រូវបានបង្កើត គ.ជ.ក.ប. ដោយសារ៖

• ដោយសារប្រទេសកម្ពុជាមិនទាន់មានគណៈកម្មាធិការនេះនៅឡើយ
• គណៈកម្មាធិការនេះជាគណៈកម្មាធិការអន្តរវិស័យដែលបំពេញការងារក្នុងគោលដៅការពារសិទ្ធិនិងផលប្រយាជន៍របស់អ្នកប្រើប្រាស់
• ការពង្រឹងកិច្ចសហការ និងសម្របសម្រួលក្នុងការអនុវត្តច្បាប់ស្តីពីកិច្ចការពារអ្នកប្រើប្រាស់ជាមួយនឹងបញ្ញត្តិករ/ស្ថាប័នពាក់ព័ន្ធ។ល។
• គណៈកម្មាធិការនេះដឹកនាំដោយរដ្ឋមន្ត្រីក្រសួងពាណិជ្ជកម្ម មានសមាសភាពមកពីក្រសួងស្ថាប័នពាក់ព័ន្ធមួយចំនួន និងមានអគ្គនាយកដ្ឋាន «ក.ប.ប.» ជាលេខាធិការក្នុងការបំពេញកាតព្វកិច្ច និងមុខងារ ដែលពាក់ព័ន្ធនឹងកិច្ចការពារអ្នកប្រើប្រាស់ស្របតាមប​ទប្បញ្ញត្តិនៃច្បាប់នេះ។

6. ហេតុអ្វីប្រធានគណៈកម្មាធិការនេះ ជារដ្ឋមន្រ្តីក្រសួងពាណិជ្ជកម្ម?

ចម្លើយ៖ ក្រសួងពាណិជ្ជកម្មជាសាមីក្រសួងក្នុងការរៀបចំសេចក្តីព្រាងច្បាប់ស្តីពីកិច្ចការពារអ្នកប្រើប្រាស់នេះឡើង ដែលរដ្ឋមន្រ្តីក្រសួងពាណិជ្ជកម្មត្រូវតែជាប្រធាននៃគណៈកម្មាធិការនេះ ដូចបណ្តាក្រសួង/ស្ថាប័នសាមីស្នើឬតាក់តែងច្បាប់ ដែលតែងតែជាប្រធានក្នុងគណៈកម្មាធិការឬយន្តការ ដែលបានចែងក្នុងច្បាប់នោះតែម្តង(នេះមិនមែនជាយន្តការបង្កើតថ្មីទេ)។

• តើគណៈកម្មាធិការជាតិការពារអ្នកប្រើប្រាស់​ «គ.ជ.ក.ប.» និងអគ្គនាយកដ្ឋានការពារអ្នកប្រើប្រាស់ កិច្ចការប្រកួតប្រជែង និងបង្ក្រាបការក្លែងបន្លំ «ក.ប.ប.» មានតួនាទីអ្វីខ្លះដែលច្បាប់ស្ដីពីកិច្ចការពារអ្នកប្រើប្រាស់ និងបទប្បញ្ញាត្តិផ្តល់អាណត្តិអោយ?

        ចម្លើយ៖  នៅក្រោមច្បាប់ស្ដីពីកិច្ចការពារអ្នកប្រើប្រាស់កម្ពុជា៖

• គណៈកម្មាធិការជាតិការពារអ្នកប្រើប្រាស់ «គ.ជ.ក.ប.» មានភារកិច្ចចម្បងក្នុងការរៀបចំនិងផ្សព្វផ្សាយគោលនយោបាយ និងផែនការយុទ្ធសាស្ត្រពាក់ព័ន្ធនឹងកិច្ចការពារអ្នកប្រើប្រាស់ដូចដែលមានចែងលំអិតនៅក្នុងអនុក្រឹត្យលេខ១៣៥ អនក្រ.បក ស្តីពីការរៀបចំនិងការប្រព្រឹត្តទៅរបស់គណៈកម្មាធិការជាតិការពារអ្នកប្រើប្រាស់​ ចុះថ្ងៃទី២៧ ខែសីហា ឆ្នាំ២០២០។
• អគ្គនាយកដ្ឋានការពារអ្នកប្រើប្រាស់ កិច្ចការប្រកួតប្រជែង និងបង្ក្រាបការក្លែងបន្លំ «ក.ប.ប.» ជាសេនា      ធិការ និងជាលេខាធិការដ្ឋាន មានភារកិច្ចអនុវត្តច្បាប់​ស្តី​ពីកិច្ចការពារអ្នកប្រើប្រាស់។
• ​តើសមាគមអ្នកប្រើប្រាស់គឺជាអ្វី ហើយបង្កើតឡើងក្នុងគោលបំណងអ្វីដែរ?

ចម្លើយ៖ សមាគមអ្នកប្រើប្រាស់ គឺជាអង្គការ​ដែលបង្កើ​តឡើ​ង​ដោយក្រុមអ្នកប្រើប្រាស់​ ដើម្បីកា​រពារសិទ្ធិ និងផលប្រយោជន៍​របស់ពួកគាត់។ សមាគមអ្នកប្រើប្រាស់តាមវិស័យនេះបង្កើតឡើងក្នុងគោលបំណង ៖

• ធ្វើជាតំណាងចំពោះមុខគណៈកម្មាធិការជាតិការពារអ្នក​ប្រើប្រាស់ឬចំពោះមុខ​តុ​លាការ​ជំនួសឱ្យក្រុម​អ្នក​ប្រើប្រាស់ ឬអ្នកប្រើប្រាស់​ណាមួយ
• តំណាងទស្សនៈនិងផលប្រយោជន៍របស់អ្នកប្រើប្រាស់នៅក្នុងវេទិកាសាធារណៈ ឬសារព័ត៌មាន
• ផ្តល់សេវា និងការប្រឹក្សាយោបល់ជូនអ្នកប្រើប្រាស់
• លើកកម្ពស់ការចូលរួមពីអង្គការសង្គមស៊ីវិល។ល។
• តើសកម្មភាពអ្វីខ្លះ ដែលត្រូវបានហាមឃាត់ក្រោមច្បាប់ស្តីពីកិច្ចការពារអ្នកប្រើប្រាស់?

        ចម្លើយ៖  សកម្មភាព​​សំខាន់ៗ​ ដែលត្រូវបានហាមឃាត់ក្រោមច្បាប់នេះរួមមាន៖

• អំពើមិនសុចរិត​ក្នុង​ធុរកិច្ច​ (មាត្រា ៩ដល់មាត្រា ១២)
• ការអនុវត្តមិនសុចរិត​ (មាត្រា ១៣ ដល់មាត្រា ២២)
• បទដ្ឋានព័ត៌មានសម្រាប់អ្នកប្រើប្រាស់ (មាត្រា ២៣ ដល់មាត្រា ២៧)
• ការហាមឃាត់ពី​មុខងារគ្រប់គ្រង​ (មាត្រា ៣៥)
• តើអ្វីទៅជាអំពើមិនសុចរិត​ក្នុង​ធុរកិច្ច?

ចម្លើយ៖​​     នៅក្រោមច្បាប់ស្តីពីការការពារអ្នកប្រើប្រាស់ អំពើមិនសុចរិតក្នុងធុរកិច្ចសំដៅដល់អំពើណាមួយរបស់បុគ្គលនៅក្នុងធុរកិច្ចដែលអាចបំភាន់ ឬបោកបញ្ឆោតអ្នកប្រើប្រាស់ ទោះបីជាអំពើនោះធ្វើដោយចេតនាឬអចេតនាក៏ដោយ។

1. តើអំពើមិនសុចរិតក្នុងការធ្វើធុរកិច្ចមានអ្វីខ្លះ?

ចម្លើយ៖  អំពើមិនសុចរិតក្នុងការធ្វើធុរកិច្ច សំដៅដល់ការបំភាន់ ឬបោកបញ្ឆោតអ្នកប្រើប្រាស់តាមរយៈ ៖

• ទង្វើឬអំណះអំណាងទាំងឡាយ ដូចជាការផ្សាយពាណិជ្ជកម្ម ការជំរុញការលក់ និងអំណះអំណាងផ្សេងទៀត
• ការធ្វើឱ្យអ្នកប្រើប្រាស់មានការភាន់ច្រឡំអំពីថ្លៃ តម្លៃ ឬគុណភាពនៃ​ទំនិញឬ​សេវា
• ការមិនបង្ហាញដល់អ្នកប្រើប្រាស់នូវការសន្យា ការ​រំពឹង​ទុក និង​ព័ត៌មាន​ដែល​ពាក់ព័ន្ធ​
• ការទាញអត្ថប្រយោជន៍ពីអ្នកប្រើប្រាស់
• តើអំពើមិនសុចរិតទាក់ទងនឹងទំនិញ ពាក់ព័ន្ធនឹងអ្វីខ្លះ?

ចម្លើយ៖  អំពើមិនសុចរិតទាក់ទងនឹងទំនិញ ពាក់ព័ន្ធនឹង៖

• ប្រភេទរបស់ទំនិញ
• ដំណើរការផលិតរបស់ទំនិញ
• ចរិតលក្ខណៈរបស់ទំនិញ
• ភាពសមតាមបំណងរបស់ទំនិញ
• បរិមាណនៃទំនិញ
• តើអំពើមិនសុចរិតទាក់ទងនឹងសេវា ពាក់ព័ន្ធនឹងអ្វីខ្លះ?

ចម្លើយ៖  អំពើមិនសុចរិតទាក់ទងនឹងសេវា ពាក់ព័ន្ធនឹង៖

• ប្រភេទរបស់សេវា
• ចរិកលក្ខណៈរបស់សេវា
• ភាពសមតាមបំណងរបស់សេវា
• ទំហំរបស់សេវា
• តើអ្វីជា​ការ​អះ​អាង​ដោយ​បំភាន់​?

ចម្លើយ៖ ការ​អះអាង​ដោយ​បំភាន់​សំដៅ​ដល់​ការ​អះអាង​របស់​បុគ្គល​​ធ្វើ​​ធុរកិច្ច​​ណាមួយ​ធ្វើ​ឱ្យ​អ្នក​ប្រើប្រាស់​មានការជឿជាក់ថា​អ្វីមួយ​ពិត​ ប៉ុន្តែ​ជាក់​ស្ដែង​មិន​មែន​ជា​ការ​ពិត​។​ ​

1. តើការអះអាងដោយបំភាន់ កើតឡើងនៅពេលណា?

ចម្លើយ៖ ការអះអាងដោយបំភាន់ អាចកើតឡើងនៅពេលដែល៖

• បុគ្គលណាមួយនិយាយ ឬធ្វើឱ្យបុគ្គលដ៏ទៃទៀតជឿជាក់ថាអ្វីមួយជាការពិត នៅពេលដែល​ជាក់ស្តែងវាមិនមែនជាការពិត
• បុគ្គលដែលធ្វើការបង្ហាញនោះ បានដឹងថាវាមិនមែនជាការពិត ឬអះអាងថាវាជាការពិត ទោះបីបុគ្គលនោះមិនបានដឹងថាពិតឬមិនពិត ហើយមិនបានព្យាយាមស្វែងរកការពិត​ដើម្បីបញ្ជាក់ថាការបង្ហាញនោះជាការពិត ឬ​មិនពិត និងព្រមទាំង​ធ្វើ​ការ​​សន្និដ្ឋានដោយធ្វេសប្រហែស។
• តើការអះអាងដោយបំភាន់លើទំនិញមានលក្ខណៈពិសេសយ៉ាងណាខ្លះ?

ចម្លើយ៖​  ការអះអាងដោយបំភាន់លើទំនិញថា​​មានលក្ខណៈពិសេសដោយឡែកចំពោះ៖

• ប្រភេទនៃទំនិញ
• បទដ្ឋាន (លក្ខខណ្ឌតម្រូវផ្នែកបច្ចេកទេសរបស់ទំនិញ)
• គុណភាពរបស់ទំនិញ
• ចំណាត់ថ្នាក់របស់ទំនិញ
• បរិមាណរបស់ទំនិញ
• សមាសភាពរបស់ទំនិញ
• ការរចនារបស់ទំនិញ
• ម៉ូដែលរបស់ទំនិញ
• ប្រវត្តិរបស់ទំនិញឬការប្រើប្រាស់ពីមុន
• តើការអះអាងដោយបំភាន់លើសេវា មានលក្ខណៈពិសេសយ៉ាងណាខ្លះ?

ចម្លើយ៖​​ ការអះអាងដោយបំភាន់លើសេវាមានលក្ខណៈពិសេសដោយឡែកចំពោះ៖

• ប្រភេទនៃសេវា
• បទដ្ឋាន (លក្ខខណ្ឌតម្រូវផ្នែកបច្ចេកទេសរបស់សេវា)
• គុណភាពរបស់សេវា
• ទំហំរបស់សេវា
• ការផ្គត់ផ្គង់សេវាដោយបុគ្គលដែលមានមុខជំនាញឬលក្ខណៈសម្បត្តិណាមួយពិសេសដោយឡែក

18.  តើអ្វីទៅជាការអនុវត្តមិនសុចរិតក្នុងធុរកិច្ច?

ចម្លើយ៖  ការអនុវត្តមិនសុចរិតក្នុងធុរកិច្ច គឺជាសកម្មភាពមួយត្រូវបានធ្វើឡើងក្នុងទម្រង់ច្បាស់លាស់ មានការរៀបចំជាមុនជាក់លាក់ ដើម្បីពង្វាង ភូតកុហក បោកប្រាស់ ឬធ្វើឱ្យអ្នកប្រើប្រាស់មានការភាន់ច្រលំក្នុងការទិញទំនិញឬសេវា។

19. តើសកម្មភាពអ្វីខ្លះ​ ចាត់ទុក​ជា​ការ​អនុវត្ត​មិន​សុចរិត​ក្រោមច្បាប់ស្ដីពីកិច្ច​ការពារ​អ្នកប្រើប្រាស់​?

ចម្លើយ៖     ក្រោមច្បាប់ស្ដីពីកិច្ចការពារអ្នកប្រើប្រាស់ សកម្មភាពដែលចាត់ទុកជាការអនុវត្តមិនសុចរិតរួមមាន​ដូច​តទៅ៖

• ការ​លក់​មិន​សុចរិត​
• ​ការមិនផ្តល់អំណោយ និងរង្វាន់តាមការសន្យា
• ការ​ផ្សាយ​ពាណិជ្ជកម្ម​ជា​នុយ​
• ការលក់​អូសទាញ​ដោយ​មិន​សុចរិត​
• ការ​ទាម​ទារ ឬការទទួលយក​ការ​ទូទាត់​ដោយ​គ្មាន​ចេតនា​ផ្គត់​ផ្គង់​ទំនិញ​ ឬ​សេវា​តាម​ការ​បញ្ជាទិញ​
• ការ​អះអាង​ដែល​មិន​ពិត​ ឬ​បំភាន់​អំពីសកម្មភាព​ធុរកិច្ច​មួយ​ចំនួន​
• ការ​បង្ខិត​បង្ខំ​ដោយ​កម្លាំង​ និង​ការគំរាម​ផ្លូវ​ចិត្ត​
• គម្រោង​លក់​បែប​ពីរ៉ាមីដ​
• ការលក់​ទំនិញ​ដែលមាន​ភ្ជាប់​សេចក្ដី​បរិយាយ​ពាណិជ្ជកម្ម​មិនពិត​
• ការ​អនុវត្ត​មិន​សុចរិត​ផ្សេងទៀត​ ដែល​កំណត់​ដោយ​បញ្ញត្តិករ​មាន​សមត្ថកិច្ច។​

20. តើអ្វីទៅជាការសន្យា​ផ្តល់​​ជា​​អំណោយ​ និង​រង្វាន់?

គឺជាការផ្សព្វផ្សាយដោយមានការអះអាង ឬផ្សព្វផ្សាយតាមគ្រប់ទម្រង់ គ្រប់មធ្យោបាយ រួមទាំងមធ្យោបាលឌីជីថល ដែលការសន្យាផ្តល់ជា​អំណោយ រង្វាន់ ឬ​វត្ថុ​ឥត​គិតថ្លៃ​ដទៃ​ទៀតនោះ ជាយុទ្ធសាស្រ្តទាក់ទាញអតិថិជន ឬអ្នកប្រើប្រាស់ដើម្បីទិញទំនិញ ឬសេវារបស់ខ្លួន ដែលយុទ្ធសាស្រ្តនោះគឺជាការពង្វាងការពិត ភូតកុហក ឬបោកប្រាស់។

21. តើអ្វីទៅជាការផ្សាយពាណិជ្ជកម្មជានុយ?

ការផ្សាយពាណិជ្ជកម្មជានុយ គឺសំដៅលើរាល់ការផ្សាយពាណិជ្ជកម្មដើម្បីផ្គត់ផ្គង់ទំនិញ ឬសេវាក្នុងតម្លៃទាប ឬការប្រើនូវមធ្យោបាលផ្សេងៗទៀតដើម្បីទាក់ទាញអ្នកប្រើប្រាស់ ដោយសង្ឃឹមថាអ្នកប្រើប្រាស់នោះនឹងទិញទំនិញ ឬសេវាដ៏ទៃផ្សេងៗទៀតជំនួសឱ្យទំនិញ ឬសេវាដែលបានផ្សព្វផ្សាយនោះ។ បុគ្គលនោះមិនមានបំណងផ្គត់ផ្គង់ ឬមិនមានមូលដ្ឋានសមស្រប ដែលអាចជឿជាក់បានថា អាចផ្គត់ផ្គង់តាមអ្វីដែលបានផ្សព្វផ្សាយនោះទេ។

22. តើអ្វីជាការលក់អូសទាញដោយមិនសុចរិត?

ការលក់​អូសទាញ​ដោយ​មិន​សុចរិត​ សំដៅដល់ការ​លក់​ទាក់​ទាញ​ ឬ​ជំរុញ​អ្នកទិញណាម្នាក់​ឱ្យ​ទិញ​ទំនិញ​ឬ​សេវា​ដោយ​ផ្អែក​លើ​លក្ខខណ្ឌ​ថា អ្នក​ទិញ​នោះ​នឹង​ទទួល​បាន​ប្រាក់​រង្វាន់​ ប្រាក់​កម្រៃ​ជើងសារ​ ឬ​អត្ថប្រយោជន៍​ដទៃទៀត​ជាថ្នូរ​នឹង​ការ​ផ្ដល់​ឈ្មោះ​អតិថិជន​សក្ដានុពល​​ ឬ​ម៉្យាង​ទៀតជួយ​ដល់​បុគ្គល​នោះ​ក្នុង​ការ​បញ្ចុះ​បញ្ចូល ឬ​អូស​ទាញ​អ្នក​ទិញ​ឬ​អ្នកប្រើប្រាស់​ផ្សេងទៀត​ដើម្បី​ទទួល​បាន​កម្រៃជើងសារ​ ឬ​ការបញ្ចុះ​ថ្លៃ​ទំនិញ​ ឬ​បង្កើត​នូវ​ព្រឹត្តិការណ៍​ផ្សេង​ ដើម្បី​អូសទាញ​អ្នក​ទិញ​ដ៏ទៃទៀត​ឱ្យ​មក​ទិញ​ទំនិញ​តាម​ការ​បញ្ចុះបញ្ចូល​។​ ​

• តើអ្វីទៅជាការ​ទាម​ទារ ឬ​ការទទួល​យក​ការទូទាត់​ ដោយ​គ្មាន​ចេតនា​ផ្គត់​ផ្គង់​ទំនិញឬសេវាតាមការ​បញ្ជាទិញ?

​ចម្លើយ៖  គឺជាការទាម​ទារ ឬបង្គាប់ឱ្យបង់ប្រាក់ជាមុន ឬទទួល​​យក​ការទូទាត់ ចំពោះការទិញទំនិញឬសេវា ឬតម្លៃតបស្នងដ៏ទៃទៀត ​ ក្នុងករណីដែលអ្នកផ្គត់ផ្គង់​នោះ​៖   ​

• ​មិ​ន​មាន​បំណង​​​ផ្គត់​ផ្គង់​ទំនិញឬ​សេវា​ តាមការបញ្ជាទិញ ឬ ​
• មាន​បំណង​ផ្គត់​ផ្គង់​ទំនិញ​ឬ​សេវា​ ដែល​ខុសពី​​ទំនិញ​ឬ​សេវាតាមការបញ្ជាទិញ ឬ​​​
• មិន​មាន​មូល​ហេតុ​​សមហេតុ​ផលដើម្បី​​បញ្ជាក់ថាអ្នកផ្គត់ផ្គង់​នោះ​អាចនឹង​ផ្គត់​ផ្គង់​​​ទំនិញឬ​សេវា​បានក្នុង​   

    រយៈពេល​កំណត់ ឬ​​ក្នុង​រយៈ​ពេល​សមស្រប​តាម​ការបញ្ជាទិញ​។​

• តើអ្វីទៅជាការ​អះអាងដែលមិនពិតឬដែល​បំភាន់​អំពី​សកម្ម​ភាពធុរកិច្ច​មួយចំនួន​​?

ចម្លើយ៖  ១- គឺជា​ការ​អះអាង​ដែល​មិន​ពិត​​​ឬដែល​​បំភាន់ ​ទាក់​ទងទៅ​​​នឹង​ការ​ទទួល​បាន​ចំណេញ ឬ ​ហានិភ័យ ឬ​​សារៈ​សំខាន់ផ្សេងៗទៀត​ក្នុង​សកម្ម​ភាព​ធុរកិច្ច​ណាមួយដែល​បុគ្គល​នោះបាន​អះ​អាង​ថាបុគ្គលផ្សេងទៀតអាចធ្វើសកម្មភាពធុរកិច្ចនោះបានពីទីលំនៅរបស់ខ្លួន។

២​- គឺជាការ​​អះ​អាង​ដែល​មិន​ពិតឬដែល​បំភាន់​​​​​​​លើចំណុច​សំខាន់​ៗ​​ទាក់​ទង​នឹង​​​ការទទួលបាន​ចំណេញ​

​​​​ហានិភ័យ ឬ​​​​សារៈ​សំខាន់​ដទៃ​ទៀត​នៃ​សកម្មភាព​​ធុរកិច្ចណាមួយដែល​បុគ្គល​នោះអញ្ជើញ​​បុគ្គល​ដទៃ​ទៀតតាម​រយៈ​ការ​ផ្សាយ​ពាណិជ្ជកម្មឬតាមមធ្យោបាយផ្សេងទៀតឱ្យចូល​​​រួម ​ហើយ​​ដែល​​សកម្ម​ភាព​ធុរកិច្ចនោះ​តម្រូវ​​ឱ្យ​មាន៖

                    ក- ​ការចូលរួម​បំពេញ​ការ​ងារ​​​ដោយ​បុគ្គលដទៃទៀត​ ​​ ឬ​

       ខ- ការ​វិនិយោគ​​​ប្រាក់និង​ការចូលរួម​បំពេញ​ការ​ងារ​ដោយបុគ្គល​ដែល​​ទាក់​ទង​នឹង​ការ​វិនិ​យោគ​​​នោះ។

• តើអ្វីជាការលក់ទំនិញដែល​​​​មានភ្ជាប់សេចក្តីបរិយា​យ​ពាណិជ្ជកម្ម​មិនពិត?

ចម្លើយ៖  សេចក្តីបរិយា​យ​ពាណិជ្ជកម្ម​មិនពិត​ គឺជាសេចក្តីបរិយាយ ឬការធ្វើឡើងដោយវោហាសព្ទ ពាក់ព័ន្ធនឹងការផ្គត់ផ្គង់ទំនិញ ឬការជំរុញការផ្គត់ផ្គង់ទំនិញតាមគ្រប់មធ្យោបាយ ដែលមានលក្ខណៈភូតកុហ​ក បំភាន់ និងពង្វាងការពិត

• តើវិធីសាស្រ្តនៃការដាក់ពាក្យប្ដឹងតវ៉ានោះធ្វើឡើងយ៉ាងដូចម្តេច?

ចម្លើយ៖            វិធីសាស្រ្តនៃការដាក់ពាក្យប្តឹងតវ៉ាអាចធ្វើទៅបានតាមជំហានដូចខាងក្រោម៖

• ជំហានបឋម៖ ជាដំបូង អ្នកប្រើប្រាស់អាចទាក់ទងទៅផ្នែកសេវាកម្មអតិថិជន ឬផ្នែកជំនួយព័ត៌មានពីក្រុមហ៊ុនផ្គត់ផ្គង់ទំនិញ ឬសេវាដើម្បីស្វែងរកដំណោះស្រាយ។​
• ប្រឹក្សាយោបល់៖ ប្រសិនបើការប្ដឹងតវ៉ានេះមិនអាចដោះស្រាយបាន អ្នកប្រើប្រាស់អាចស្វែងរកជំនួយពីសមាគមអ្នកប្រើប្រាស់តាមវិស័យណាមួយ ឬអាចប្រឹក្សា គ.ជ.ក.ប. ដែលមានអគ្គនាយកដ្ឋានការពារអ្នកប្រើប្រាស់ កិច្ចការប្រកួតប្រជែង និងបង្រ្កាបការក្លែងបន្លំ «ក.ប.ប.» ដែលជាលេខាធិការ ឬស្ថាប័នមានសមត្ថកិច្ចពាក់ព័ន្ធណាមួយ ដើម្បីទទួលបានសេចក្ដីណែនាំបន្ថែម។
• ស្ថាប័នទទួលបន្ទុកដោះស្រាយបណ្តឹង៖ មានស្ថាប័នពាក់ព័ន្ធផ្សេងៗគ្នា ដែលមានសមត្ថកិច្ចអាចជួយដោះស្រាយបណ្តឹងក្រៅប្រព័ន្ធតុលាការបាន។ ស្ថាប័នទាំងនេះរួមមាន អគ្គនាយកដ្ឋានការពារអ្នកប្រើប្រាស់ កិច្ចការប្រកួតប្រជែង និងបង្រ្កាបការក្លែងបន្លំ «ក.ប.ប.» ដែលជាលេខាធិការនៃគណៈកម្មាធិការជាតិការពារអ្នកប្រើប្រាស់ បញ្ញត្តិករ និយ័តករតាមវិស័យ ឬស្ថាប័នដោះស្រាយវិវាទផ្សេងៗទៀត។
• ជំហានចុងក្រោយ៖ ក្នុងករណីអ្នកប្រើប្រាស់មិនពេញចិត្តនឹងដំណោះស្រាយរបស់ស្ថាប័នមានសមត្ថកិច្ច អ្នកប្រើប្រាស់អាចដាក់ពាក្យបណ្តឹងបន្តទៅតុលាការមានសមត្ថកិច្ច ឬមានការគាំទ្រពីអ្នកជំនាញផ្នែកច្បាប់ដើម្បីស្វែងរកដំណោះស្រាយចុងក្រោយ។
• នៅក្រោម​ច្បាប់​ពីស្ដី​កិច្ចការពារអ្នកប្រើប្រាស់ តើបុគ្គលបានបំពាន​ច្បាប់​ត្រូវ​ប្រឈម​​ទោសទណ្ឌអ្វីខ្លះ​?

        ចម្លើយ៖ បុគ្គលណាមួយដែលបានរកឃើញថា​​ បានប្រព្រឹត្តដោយបំពានច្បាប់ស្តីពីកិច្ចការពា​រអ្នក​ប្រើប្រា​ស់​ ត្រូវប្រឈម​នឹងការ​ព្រមានជាលាយលក្ខណ៍អក្សរ ការពិន័យអន្តរការណ៍ ការព្យួរ ការដ​កហូត ឬការលុបចោលវិញ្ញាបនប័ត្រចុះបញ្ជីពាណិជ្ជកម្ម ឬអាជ្ញាប័ណ្ណអាជីវកម្ម ការហាមឃាត់​ពីមុខងារគ្រប់គ្រង ឬទោសពិន័យជាប្រាក់តាមការសំរេចរបស់តុលាការមានសមត្តកិច្ច។​

• តើអ្វីជាការប្រកួតប្រជែងដោយសុចរិត?

  ចម្លើយ៖ ការប្រកួតប្រជែងដោយសុចរិត​ សំដៅលើការប្រកួតប្រជែងដោយផ្អែកលើតម្លៃសមរម្យ គុណភាពល្អ និងសេវាកម្មល្អ ដោយអនុវត្តតាមគោលការណ៍នៃនិរន្តរភាពសេដ្ឋកិច្ចយូរអង្វែង និងមិនបំពានអំណាច ឬជំហរឧត្តមភាពលើទីផ្សាររបស់ក្រុមហ៊ុនណាមួយឡើយ។

• តើ​អ្វី​ជា​គម្រោង​លក់​បែប​ពីរ៉ាមីដ​?

  ចម្លើយ៖ គម្រោង​លក់​បែប​ពីរ៉ា​មីដ​គឺជាការរៀបចំ ឬសកម្មភាពវិនិយោគដែលមានលក្ខណៈបោកប្រាស់ដែលត្រូវបានរៀបចំឡើងដើម្បីទាក់ទាញអ្នកចូលរួមធ្វើការវិនិយោគលើការលក់ ការជូល ការទទួលអាជ្ញាប័ណ្ណ និងការចែកចាយផលិតផល ឬសេវាផ្សេងទៀត។ គម្រោងនេះធ្វើឡើងដោយការបញ្ចុះបញ្ជូល ឬកាទាក់ទាញអ្នកចូលរួម ឬវិនិយោគិនឱ្យចូលរួមក្នុងដំណើរការធុរកិច្ចមួយតាមរយៈការសន្យា និងអាចទទួលបានប្រាក់ចំណេញខ្ពស់។បន្ទាប់ពីអ្នកចូលរួមត្រូវបានទាក់ទាញ ឬបញ្ជុះបញ្ជូលរួចមក អ្នកចូលរួមថ្មីៗទាំងនោះតម្រូវឱ្យធ្វើការជ្រើសរើសបុគ្គល 

   ផ្សេងៗទៀតដោយផ្ទាល់ ឬប្រយោលដើម្បីបង្កើនសមាជិក។

• ​ តើបទដ្ឋានព័ត៌មានអ្វីខ្លះ​ត្រូវលាត​ត្រដាង​​ដ​ល់អ្ន​កប្រើ​ប្រាស់​?

ចម្លើយ៖​ បទដ្ឋានព័ត៌មានដែល​តម្រូវឱ្យលាតត្រដាងសម្រាប់អ្នកប្រើប្រាស់មានជាអាទិ៍៖​ ប្រភេទ ចំណាត់ថ្នាក់​ ​សុវត្ថិភាព បរិមាណ ប្រភពដើម មុខងារនៃការប្រើ​ប្រា​ស់ ការថែទាំ សមាសភាព ការរចនា ផលិត​ផល​បង្គំ​ ការប្រើប្រាស់តម្លៃ ​ការវេច​ខ្ចប់ ការផ្សាយ​ពាណិជ្ជកម្ម ឬ​ការ​ផ្គត់ផ្គង់ព័ត៌​មាន​ កាលបរិច្ឆេទផលិត កាលបរិច្ឆេទផុតកំណត់ និងព័ត៌មានផលិតកម្ម។

• តើអ្វីទៅជាការហាមឃាត់ពីមុខងារគ្រប់គ្រង?

ចម្លើយ៖ គឺជាការចេញសេចក្តីសម្រេចហាមឃាត់បុគ្គលណាមួយដែលបានប្រព្រឹត្តបទល្មើស ដោយគណៈកម្មាធិការជាតិការពារអ្នកប្រើប្រាស់ ចំពោះបទល្មើសខាងក្រោម៖

1. បុគ្គលនោះបានប្រព្រឹត្តល្មើសនឹងអំពើមិនសុចរិត និងការអនុវត្តមិនសុចរិតចាប់ពី ២ដងឡើងទៅ
2. បុគ្គលនោះបានប្រព្រឹត្តល្មើស៖

ក. មិនបានលាតត្រដាងបទដ្ឋានព័ត៌មានសម្រាប់អ្នកប្រើប្រាស់

ខ. មិនបានបំពេញកាតព្វកិច្ចក្នុងការប្រត្តិបត្តិតាមបទដ្ឋានព័ត៌មានសម្រាប់អ្នកប្រើប្រាស់

គ. មិនបានធ្វើការជូនដំណឹងអំពីបទដ្ឋានព័ត៌មានសម្រាប់អ្នកប្រើប្រាស់

• បុគ្គលដែលត្រូវបានហាមឃាត់ដោយរដ្ឋបរទេសទាក់ទងនឹងកិច្ចការពារអ្នកប្រើប្រាស់ដូចមានចែងក្នុងចំនុច១ និងចំនុច ២។
• តើអ្នកប្រើប្រាស់អាចដាក់ពាក្យបណ្តឹងមក​ ក.ប.ប. បាន​តាមមធ្យោបាយណាខ្លះ?

ចម្លើយ៖​ អ្នក​ប្រើប្រា​ស់អា​ចដាក់បណ្តឹងមកកាន់អគ្គនាយកដ្ឋាន ក.ប.ប បានតាមរយៈមធ្យោបាយនានាដូចខាងក្រោម៖

• វិបសាយ www.ccf.gov.kh
• ប្រអប់សំបុត្រនៅអគ្គនាយកដ្ឋាន ឬនៅតាមសាខា ក.ប.ប រាជនីខេត្ត
• ហ្វេសប៊ុកផេក​ www.facebook.com/ccfkh
• លេខទូរស័ព្ទ (+855) 23 231 856 , 92 930 856
• ​កម្មវិធីទូរស័ព្ទ​ Complaint App)។

សំណួរដែលត្រូវបានសួរជាញឹកញាប់
ស្ថិតក្រោមច្បាប់និងបទប្បញ្ញត្តិពាក់ព័ន្ធនឹងកិច្ចការប្រកួតប្រជែង
១. តើច្បាប់ស្ដីពីការប្រកួតប្រជែងត្រូវបានអនុម័តនៅពេលណា និងមានគោលបំណងចម្បងអ្វីខ្លះ?
ចម្លើយ៖ ច្បាប់ស្ដីពីការប្រកួតប្រជែងត្រូវបានប្រកាសឱ្យប្រើកាលពីថ្ងៃទី៥ ខែតុលា ឆ្នាំ២០២១ ហើយច្បាប់នេះមានគោលបំណងដើម្បីលើកទឹកចិត្តឱ្យមានទំនាក់ទំនងធុរកិច្ចដោយស្មើភាពនិងស្មោះត្រង់ បង្កើនប្រសិទ្ធភាពសេដ្ឋកិច្ច ជំរុញឱ្យមានការបង្កើតធុរកិច្ចថ្មីៗ និងជួយអ្នកប្រើប្រាស់ឱ្យទទួលបានទំនិញនិងសេវាមានគុណភាពខ្ពស់ ថ្លៃទាប សម្បូរបែប និងមានជម្រើសច្រើន។
២. តើច្បាប់ស្ដីពីការប្រកួតប្រជែងមានវិសាលភាពអនុវត្តយ៉ាងដូចម្ដេច? តើស្ថាប័នណាដែលមានសមត្ថកិច្ចអនុវត្តច្បាប់នេះ?
ចម្លើយ៖ ច្បាប់ស្ដីពីការប្រកួតប្រជែង មានវិសាលភាពអនុវត្តចំពោះបុគ្គលធ្វើសកម្មភាពធុរកិច្ច ឬធ្វើសកម្មភាពគាំទ្រដល់ធុរកិច្ចពាក់ព័ន្ធនឹងការរារាំង រឹតត្បិត ឬបង្ខូចដល់ការប្រកួតប្រជែងគួរឱ្យកត់សម្គាល់ក្នុងទីផ្សារនៃព្រះរាជាណាចក្រកម្ពុជា ទោះបីសកម្មភាពនោះមានប្រភពនៅក្នុងឬក្រៅប្រទេសក៏ដោយ។
ស្ថាប័នដែលមានសមត្ថកិច្ចក្នុងការអនុវត្តច្បាប់ស្ដីពីការប្រកួតប្រជែង គឺគណៈកម្មាធិការប្រកួតប្រជែងកម្ពុជា «គ.ប.ក.» ដឹកនាំដោយរដ្ឋមន្ត្រីក្រសួងពាណិជ្ជកម្មនិងមានការចូលរួមពីក្រសួង ស្ថាប័នពាក់ព័ន្ធ និងបុគ្គលឯករាជ្យចំនួន៥ (ប្រាំ) រូបជាសមាជិក និងមានអគ្គនាយកដ្ឋាន ការពារអ្នកប្រើប្រាស់ កិច្ចការប្រកួតប្រជែង និងបង្រ្កាបការក្លែងបន្លំ «ក.ប.ប.» ជាសេនាធិការក្នុងការបំពេញភារកិច្ចនានាពាក់ព័ន្ធនឹងកិច្ចការប្រកួតប្រជែងស្របតាមបទប្បញ្ញត្តិមានជាធរមាន។
៣. តើគណៈកម្មាធិការប្រកួតប្រជែងកម្ពុជា «គ.ប.ក.» និងអគ្គនាយកដ្ឋានការពារអ្នកប្រើប្រាស់ កិច្ចការប្រកួតប្រជែង និងបង្ក្រាបការក្លែងបន្លំ «ក.ប.ប.» មានតួនាទីអ្វីខ្លះនៅក្រោមច្បាប់ស្ដីពីការប្រកួតប្រជែង?
ចម្លើយ៖ គណៈកម្មាធិការប្រកួតប្រជែងកម្ពុជា «គ.ប.ក.» មានតួនាទីក្នុងការចេញសេចក្ដីសម្រេច ចេញវិធានការផ្អាកឬឃាត់ទុកជាបណ្ដោះអាសន្ន និងផាកពិន័យជាប្រាក់លើបទល្មើសក្រោមច្បាប់ស្ដីពីការប្រកួតប្រជែង ដែលមានអគ្គនាយកដ្ឋាន ក.ប.ប. ជាសេនាធិការ និងជាលេខាធិការដ្ឋាន។ គ.ប.ក. ជាស្ថាប័នទទួលបន្ទុកអនុវត្តច្បាប់ស្តីពីការប្រកួតប្រជែង និងអាចស្នើសុំកិច្ចសហការពីស្ថាប័នឬបញ្ញត្តិករមានសមត្ថកិច្ចពាក់ព័ន្ធ។
អគ្គនាយកដ្ឋាន ក.ប.ប. ក្នុងនាមជាសេនាធិការរបស់ គ.ប.ក. មានសិទ្ធិឆែកឆេរ ចាប់យកវត្ថុតាង ប្រមូលឯកសារនិងព័ត៌មាន និងកោះហៅបុគ្គលពាក់ព័ន្ធដើម្បីធ្វើការស៊ើបអង្កេតនិងដោះស្រាយលើករណីប្រកួតប្រជែង ដោយអនុវត្តតាមច្បាប់និងបទប្បញ្ញត្តិជាធរមាន។
៤. តើក្រុមហ៊ុនបរទេសដែលធ្វើសកម្មភាពធុរកិច្ចនៅក្នុងនិងក្រៅព្រះរាជាណាចក្រកម្ពុជាត្រូវស្ថិតនៅក្រោមការអនុវត្តច្បាប់ស្ដីពីការប្រកួតប្រជែងកម្ពុជាដែរឬទេ?
ចម្លើយ៖ ក្រុមហ៊ុនបរទេសដែលធ្វើសកម្មភាពធុរកិច្ច ឬធ្វើសកម្មភាពគាំទ្រដល់ធុរកិច្ចនៅក្នុងនិងក្រៅព្រះរាជាណាចក្រកម្ពុជា គឺស្ថិតក្រោមច្បាប់ស្ដីពីការប្រកួតប្រជែង ប្រសិនបើសកម្មភាពនោះមានឬអាចមានកម្មវត្ថុ ឬអានុភាពរារាំង រឹតត្បិត ឬបង្ខូចដល់ការប្រកួតប្រជែងគួរឱ្យកត់សម្គាល់នៅក្នុងទីផ្សារនៃព្រះរាជាណាចក្រកម្ពុជា។
៥. តើច្បាប់ស្ដីពីការប្រកួតប្រជែងបានហាមឃាត់នូវសកម្មភាព និងការព្រមព្រៀងអ្វីខ្លះ?
ចម្លើយ៖ ច្បាប់ស្ដីពីការប្រកួតប្រជែងបានហាមឃាត់នូវសកម្មភាព និងការព្រមព្រៀងដែលរារាំង រឹតត្បិត ឬបង្ខូចដល់ការ ប្រកួតប្រជែងដូចខាងក្រោម៖

• ការព្រមព្រៀងខ្សែដេក (មាត្រា៧)
• ការព្រមព្រៀងខ្សែឈរ (មាត្រា៨)
• សកម្មភាពបំពានដោយប្រើជំហរឧត្តមភាពលើទីផ្សារ (មាត្រា៩)
• ការរួមបញ្ចូលគ្នានៃធុរកិច្ច (មាត្រា១១)។
  ៦. តើមានសកម្មភាពអ្វីខ្លះដែលត្រូវបានហាមឃាត់នៅក្រោមការព្រមព្រៀងខ្សែដេក?
  ចម្លើយ៖ សកម្មភាពដែលត្រូវបានហាមឃាត់នៅក្រោមការព្រមព្រៀងខ្សែដេក (មាត្រា៧នៃច្បាប់ស្តីពីការប្រកួតប្រជែង) មានដូចខាងក្រោម៖
• ការព្រមព្រៀងការកំណត់ថ្លៃ គ្រប់គ្រងថ្លៃ រក្សាថ្លៃ ចំពោះទំនិញឬសេវា។
• ការព្រមព្រៀងការរារាំង រឹតត្បិត កម្រិត បរិមាណ ប្រភេទ និងការអភិវឌ្ឍទំនិញឬសេវា។
• ការព្រមព្រៀងការបែងចែកតំបន់ភូមិសាស្រ្តរវាងគូប្រកួតប្រជែង។
• ការព្រមព្រៀងការបែងចែកអតិថិជនរវាងគូប្រកួតប្រជែង។
• ការដេញថ្លៃទាំងឡាយណាដែលមានទំនោរទៅរកតែអ្នកដេញថ្លៃតែមួយ ដើម្បីទទួលបានកិច្ចសន្យា ដេញថ្លៃនោះសម្រាប់ការធ្វើលទ្ធកម្មឯកជន។
  ៧. តើមានសកម្មភាពអ្វីខ្លះដែលត្រូវបានហាមឃាត់នៅក្រោមការព្រមព្រៀងខ្សែឈរ?
  ចម្លើយ៖ សកម្មភាពដែលត្រូវបានហាមឃាត់នៅក្រោមការព្រមព្រៀងខ្សែឈរ (មាត្រា៨នៃច្បាប់ស្តីពីការប្រកួតប្រជែង) ត្រូវបានបែងចែកជា២ផ្នែក៖
• ផ្នែកទី១៖ ការតម្រូវឱ្យអ្នកទិញលក់បន្ដនូវទំនិញឬសេវាដែលបានទិញ ក្នុងតម្លៃអប្បបរមាមួយដោយផ្ទាល់ឬ ប្រយោល ឬតម្រូវឱ្យអ្នកទិញទទួលយកនូវលក្ខខណ្ឌរួមណាមួយដែលត្រូវបានកំណត់ដោយបុគ្គលនោះ។ការព្រមព្រៀងខ្សែឈរផ្អែកលើថ្លៃលក់ សំដៅដល់ការកំណត់ថ្លៃលក់បន្ត (ការកំណត់ថ្លៃលក់បន្តឬការកំណត់ថ្លៃខ្សែឈរ)។
• ផ្នែកទី ២៖ ការព្រមព្រៀងខ្សែឈរផ្អែកលើកត្តាដែលមិនមែនជាថ្លៃលក់ សំដៅដល់សកម្មភាពដូចខាងក្រោម៖
  ១- ការតម្រូវឱ្យអ្នកទិញលក់បន្តនូវទំនិញឬសេវានានា ដែលបានទិញតែនៅក្នុងទីតាំងភូមិសាស្ត្រកំណត់ណាមួយ។
  ២- ការតម្រូវឱ្យអ្នកទិញលក់បន្តនូវទំនិញឬសេវានានា ដែលបានទិញទៅឱ្យអតិថិជនជាក់លាក់ណាមួយឬប្រភេទ
  អតិថិជនជាក់លាក់ណាមួយ។
  ៣- ការតម្រូវឱ្យអ្នកទិញទទួលយកនូវលក្ខខណ្ឌទាំងអស់ឬស្ទើរតែទាំងអស់សម្រាប់ការទិញទំនិញឬសេវាជាក់លាក់ ណាមួយពីអ្នកលក់នោះតែមួយប៉ុណ្ណោះ។
  ៤- ការរារាំងអ្នកលក់ពីការលក់ទំនិញឬសេវាទៅឱ្យអ្នកទិញផ្សេងទៀត។
  ៥- ការតម្រូវឱ្យអ្នកទិញទិញគួបទំនិញឬសេវាដែលមិនពាក់ព័ន្ធដទៃទៀត បន្ថែមពីលើទំនិញឬសេវាដែលអ្នកទិញចង់ទិញ។
  ៨. តើមានសកម្មភាពអ្វីខ្លះដែលត្រូវបានចាត់ទុកថាជាការបំពានដោយប្រើជំហរឧត្តមភាពលើទីផ្សារ?
  ចម្លើយ៖ សកម្មភាពដែលត្រូវបានចាត់ទុកថាជាការបំពានដោយប្រើជំហរឧត្តមភាពលើទីផ្សារ (មាត្រា៩នៃច្បាប់ស្តីពីការប្រកួតប្រជែង) មានដូចខាងក្រោម៖
• ការតម្រូវឬការបញ្ចុះបញ្ចូលឱ្យអ្នកផ្គត់ផ្គង់ឬអតិថិជនមិនឱ្យធ្វើអាជីវកម្មជាមួយគូប្រកួតប្រជែង។
• ការបដិសេធមិនព្រមផ្គត់ផ្គង់ទំនិញឬសេវាឱ្យគូប្រកួតប្រជែង។
• ការលក់ទំនិញឬសេវាក្នុងលក្ខខណ្ឌដែលអ្នកទិញត្រូវទិញទំនិញឬសេវាផ្សេងទៀត ដោយឡែកដែលមិនទាក់ទងនឹងកម្មវត្ថុនៃកិច្ចសន្យា។
• ការលក់ទំនិញឬសេវាទាបជាងថ្លៃដើមផលិត។
• ការបដិសេធមិនឱ្យគូប្រកួតប្រជែងណាមួយប្រើប្រាស់មធ្យោបាយចាំបាច់។
  ៩. តើច្បាប់ស្ដីពីការប្រកួតប្រជែងមានចែងទោសប្បញ្ញត្តិអ្វីខ្លះ?
  ចម្លើយ៖ ច្បាប់ស្ដីពីការប្រកួតប្រជែង មានចែងទោសប្បញ្ញត្តិមានដូចខាងក្រោម៖
• បុគ្គលដែលបំពានមាត្រា៧ ត្រូវទទួលទណ្ឌកម្មព្រហ្មទណ្ឌដូចមានចែងក្នុងមាត្រា៣៨ រួមមាន ទោសពិន័យជាប្រាក់ និងទោសដាក់ពន្ធនាគារ។
• បុគ្គលដែលបំពានមាត្រា៨ មាត្រា៩ និងមាត្រា១១ ត្រូវទទួលទណ្ឌកម្មរដ្ឋបាលដូចមានចែងក្នុងមាត្រា៣៥ រួមមាន ការព្រមានជាលាយលក្ខណ៍អក្សរ ការព្យួរ ការដកហូត ឬការលុបចោលវិញ្ញាបនបត្របញ្ជាក់ការចុះបញ្ជីពាណិជ្ជកម្ម អាជ្ញាបណ្ណ ឬលិខិតអនុញ្ញាតប្រកបអាជីវកម្ម-សេវាកម្ម និងផាកពិន័យជាប្រាក់ពី ៣% ទៅ១០% នៃផលរបរសរុបរបស់បុគ្គលដែលទទួលបាន ក្នុងអំឡុងពេលដែលការបំពានច្បាប់បានកើតឡើង និងមិនលើសពីរយៈពេល៣(បី)ឆ្នាំ។
  ១០. តើអ្វីជាការរួមបញ្ចូលគ្នានៃធុរកិច្ច ក្រោមច្បាប់ស្ដីពីការប្រកួតប្រជែង?
  ចម្លើយ៖ ការរួមបញ្ចូលគ្នានៃធុរកិច្ច ក្រោមច្បាប់ស្ដីពីការប្រកួតប្រជែងសំដៅដល់៖
• ការទទួលបាន ឬទិញនូវសិទ្ធិគ្រប់គ្រងឬសិទ្ធិបោះឆ្នោត តាមរយៈការទិញភាគហ៊ុនឬទ្រព្យសម្បត្តិដោយបុគ្គលណាមួយពីបុគ្គលផ្សេងទៀត ឬ
• ការរំលាយបញ្ចូលគ្នារវាងបុគ្គលពីរឬច្រើន ដើម្បីក្លាយជាម្ចាស់រួមគ្នាលើនីតិបុគ្គលដែលមានស្រាប់ ឬនីតិបុគ្គលថ្មី។
  ១១. តើការរួមបញ្ចូលគ្នានៃធុរកិច្ចចាំបាច់ត្រូវត្រួតពិនិត្យ និងឯកភាពជាមុនដោយ គ.ប.ក. ដែរឬទេ? ក្នុងករណីធុរជនមានបំណងក្នុងការរួមបញ្ចូលគ្នានៃធុរកិច្ច តើធុរជនត្រូវធ្វើការជូនដំណឹង ឬស្នើសុំការឯកភាពជាមុនពី គ.ប.ក. ដោយវិធីណា?
  ចម្លើយ៖ ដោយអនុលោមតាមច្បាប់ស្ដីពីការប្រកួតប្រជែង និងអនុក្រឹត្យស្ដីពីលក្ខខណ្ឌនិងនីតិវិធីអំពីការរួមបញ្ចូលគ្នានៃធុរកិច្ច ការរួមបញ្ចូលគ្នានៃធុរកិច្ច ត្រូវត្រួតពិនិត្យនិងការស្នើសុំឯកភាពជាមុនពី គ.ប.ក. ប្រសិនបើការរួមបញ្ចូលគ្នានៃធុរកិច្ចនោះជាប់កម្រិតកំណត់ ដូចមានចែងក្នុងសេចក្តីសម្រេចលេខ០៩៥ ព.ណ អ.កបប.សសរ ចុះថ្ងៃទី១៤ ខែមីនា ឆ្នាំ២០២៣ ស្ដីពីកម្រិតកំណត់នៃការជូនដំណឹងជាមុនអំពីការរួមបញ្ចូលគ្នានៃធុរកិច្ច (អាចទាញយកពីគេហទំព័រផ្លូវការរបស់អគ្គនាយកដ្ឋាន ក.ប.ប. https://www.ccfdg.gov.kh/laws-regulations/ )។
  ១២. តើមានកម្រិតកំណត់ជាក់លាក់សម្រាប់វិស័យពាក់ព័ន្ធដែរឬទេ? ហើយកម្រិតកំណត់នោះបែបណា?
  ចម្លើយ៖ កម្រិតកំណត់នៃការជូនដំណឹងជាមុន ត្រូវបានបែងចែកជា ៣វិស័យ និង៤លក្ខខណ្ឌដូចខាងក្រោម៖
  ប្រភេទវិស័យ ប្រភេទនៃលក្ខខណ្ឌកំណត់ កម្រិតកំណត់
  (លានដុល្លារអាមេរិក) កម្រិតកំណត់
  (លានរៀល)
  ១. ធុរកិច្ចទូទៅ ទ្រព្យសរុប ៨៤ ៣៤០.០០០
  ផលរបរសរុប ៦៧ ២៧០.០០០
  ចំណូលពីការបញ្ជាទិញ ៣០ ១២០.០០០
  តម្លៃប្រតិបត្តិការ ១០ ៤១.០០០
  ២. ធនាគារ និងហិរញ្ញវត្ថុ ទ្រព្យសរុប ១.១១៨ ៤.៥០០.០០០
  ផលរបរសរុប ១០៣ ៤២០.០០០
  ចំណូលពីការបញ្ជាទិញ ៩០៣ ៣.៨០០.០០០
  តម្លៃប្រតិបត្តិការ ៣០ ១២០.០០០
  ៣. ធានារ៉ាប់រង និងមូលបត្រ ទ្រព្យសរុប ២៦០ ១.០០០.០០០
  ផលរបរសរុប ៧០ ២៨០.០០០
  ចំណូលពីការបញ្ជាទិញ ២០០ ៨២០.០០០
  តម្លៃប្រតិបត្តិការ ១៥ ៦១.០០០
  សម្គាល់៖ (សេវាសាធារណៈលើការជូនដំណឹង វិស័យធនាគារ និងហិរញ្ញវត្ថុនៅទី៣ វិស័យធានារ៉ាប់រងនិងមូលបត្រនៅទី២)
• តារាងនេះគឺ បង្ហាញពីកម្រិតកំណត់នៃការជូនដំណឹងជាមុន។ ដោយឡែក កម្រិតកំណត់នៃការជូនដំណឹងជាក្រោយគឺ ត្រូវបានកំណត់ស្មើ ឬលើសពី៥០(ហាសិប) ភាគរយនៃកម្រិតកំណត់នៃការជូនដំណឹងជាមុនខាងលើ។
• សម្រាប់ការអនុវត្ត កម្រិតកំណត់នៃការជូនដំណឹងត្រូវកំណត់យកប្រាក់រៀលជាគោល ចំណែកការគណនាចំពោះប្រាក់ដុល្លារអាមេរិក ត្រូវប្រែប្រួលទៅតាមអត្រាប្តូរប្រាក់ជាក់ស្តែងដែលកំណត់ដោយធនាគារជាតិនៃកម្ពុជា។
  ១៣. តើមាននីតិវិធីនិងលក្ខខណ្ឌអ្វីខ្លះ នៅក្រោមអនុក្រឹត្យស្ដីពីលក្ខខណ្ឌនិងនីតិវិធីអំពីការរួមបញ្ចូលគ្នានៃធុរកិច្ច និងបទប្បញ្ញត្តិពាក់ព័ន្ធ ប្រសិនបើភាគីមានបំណងរួមបញ្ចូលគ្នានៃធុរកិច្ច?
  ចម្លើយ៖ ដោយអនុលោមតាមអនុក្រឹត្យស្ដីពីលក្ខខណ្ឌនិងនីតិវិធីអំពីការរួមបញ្ចូលគ្នានៃធុរកិច្ចនិងបទប្បញ្ញត្តិពាក់ព័ន្ធ ភាគីរួមបញ្ចូលគ្នានៃធុរកិច្ចត្រូវអនុវត្តនីតិវិធីនិងលក្ខខណ្ឌដូចខាងក្រោម៖
  ប្រភេទ លក្ខខណ្ឌ
  ១. ការជូនដំណឹងជាមុន កាតព្វកិច្ច ជាប់កម្រិតកំណត់
  នៃការជូនដំណឹងជាមុន មុនបញ្ចប់ផ្នែកសំខាន់ៗ
  ២. ការចុះបញ្ជី ក្រោយបញ្ចប់ផ្នែកសំខាន់ៗ
  ៣. ការជូនដំណឹងជាក្រោយ កាតព្វកិច្ច ស្មើ ឬលើសពី ៥០(ហាសិប) ភាគរយនៃកម្រិតកំណត់នៃការជូនដំណឹងជាមុន ក្រោយបញ្ចប់ផ្នែកសំខាន់ៗ
  ៤. ការចេញវិញ្ញាបនបត្រជាមុន ការស្ម័គ្រចិត្ត - មុនបញ្ចប់ផ្នែកសំខាន់ៗ
  ១៤. ក្នុងករណីភាគីនៃការរួមបញ្ចូលគ្នានៃធុរកិច្ចមានលក្ខណៈមិនច្បាស់លាស់ ថាតើការរួមបញ្ចូលធុរកិច្ចរបស់ខ្លួន ជាប់ឬមិនជាប់កម្រិតកំណត់ តើភាគីនៃការរួមបញ្ចូលគ្នានៃធុរកិច្ចត្រូវអនុវត្តតាមនីតិវិធីបែបណា?
  ចម្លើយ៖ ក្នុងករណីភាគីនៃការរួមបញ្ចូលគ្នានៃធុរកិច្ចមានលក្ខណៈមិនច្បាស់លាស់ ថាការរួមបញ្ចូលធុរកិច្ចរបស់ខ្លួន ជាប់ឬមិនជាប់កម្រិតកំណត់ ភាគីនៃការរួមបញ្ចូលគ្នានៃធុរកិច្ច អាចធ្វើការជូនដំណឹងជាមុន ឬស្នើសុំវិញ្ញាបនបត្រជាមុនស្របតាមបែបបទនិងនីតិវិធីជាធរមាន ឬទំនាក់ទំនងមកអគ្គនាយកដ្ឋាន ក.ប.ប. ដើម្បីពិគ្រោះយោបល់ពាក់ព័ន្ធនឹងកម្រិតកំណត់របស់ខ្លួន។
  ១៥. តើរាល់ការរួមបញ្ចូលគ្នានៃធុរកិច្ចត្រូវមកចុះបញ្ជីនៅ គ.ប.ក. ដែរឬទេ?
  ចម្លើយ៖ រាល់ការរួមបញ្ចូលគ្នានៃធុរកិច្ច មិនតម្រូវឱ្យមកចុះបញ្ជីការរួមបញ្ចូលគ្នានៃធុរកិច្ចនៅ គ.ប.ក. នោះទេ។ ដោយឡែក ការរួមបញ្ចូលគ្នានៃធុរកិច្ចដែលមានកាតព្វកិច្ចជូនដំណឹងជាមុន ឬបានស្នើសុំវិញ្ញាបនបត្រជាមុន តម្រូវឱ្យមកចុះបញ្ជីការរួមបញ្ចូលគ្នានៃធុរកិច្ចនៅ គ.ប.ក. ក្នុងរយៈពេល៣០(សាមសិប)ថ្ងៃនៃថ្ងៃធ្វើការ បន្ទាប់ពីបញ្ចប់ផ្នែកសំខាន់ៗនៃប្រតិបត្តិការរួមបញ្ចូលគ្នានៃធុរកិច្ចរបស់ខ្លួន។
  ១៦. តើការពិនិត្យលើការជូនដំណឹងជាមុននៃការរួមបញ្ចូលគ្នានៃធុរកិច្ចរបស់ គ.ប.ក. មានរយៈពេលប៉ុន្មានថ្ងៃ?
  ចម្លើយ៖ បន្ទាប់ពីទទួលបានឯកសារនិងព័ត៌មានត្រឹមត្រូវនិងគ្រប់គ្រាន់អំពីការស្នើសុំការរួមបញ្ចូលគ្នានៃធុរកិច្ច គ.ប.ក. មានពីរដំណាក់កាលដើម្បីត្រួតពិនិត្យលើការរួមបញ្ចូលគ្នានៃធុរកិច្ចដែលបានស្នើសុំដូចខាងក្រោម៖
• ដំណាក់កាលទី១៖ រយៈពេល ៣០(សាមសិប)ថ្ងៃនៃថ្ងៃធ្វើការសម្រាប់ការត្រួតពិនិត្យបឋម
• ដំណាក់កាលទី២៖ រយៈពេល ១២០(មួយរយម្ភៃ)ថ្ងៃនៃថ្ងៃធ្វើការសម្រាប់ការត្រួតពិនិត្យបន្ទាប់
  ដូចនេះរយៈពេលនៃការត្រួតពិនិត្យសរុបគឺមានរយៈពេលមិនលើសពី១៥០(មួយរយហាសិប)ថ្ងៃនៃថ្ងៃធ្វើការ។
  ១៧. តើអនុក្រឹត្យស្ដីពីលក្ខខណ្ឌនិងនីតិវិធីអំពីការរួមបញ្ចូលគ្នានៃធុរកិច្ចបានកំណត់នីតិវិធីអ្វីខ្លះ សម្រាប់ការស្នើសុំ
  វិញ្ញាបនបត្រជាមុន?
  ចម្លើយ៖ ដោយអនុលោមតាមអនុក្រឹត្យស្ដីពីលក្ខខណ្ឌនិងនីតិវិធីអំពីការរួមបញ្ចូលគ្នានៃធុរកិច្ច និងបទប្បញ្ញត្តិពាក់ព័ន្ធ ការស្នើសុំវិញ្ញាបនបត្រជាមុនត្រូវអនុវត្តតាមនីតិវិធីដូចខាងក្រោម៖
• ភាគីនៃការរួមបញ្ចូលគ្នានៃធុរកិច្ចត្រូវដាក់ពាក្យស្នើសុំវិញ្ញាបនបត្រជាមុនមក គ.ប.ក.
• ក្នុងរយៈពេល៧(ប្រាំពីរ)ថ្ងៃនៃថ្ងៃធ្វើការ អគ្គនាយកដ្ឋាន ក.ប.ប. ដែលជាលេខាធិការដ្ឋាននៃ គ.ប.ក. ត្រូវចេញលិខិតទៅភាគីស្នើសុំដើម្បីឱ្យផ្ដល់នូវឯកសារនិងព័ត៌មានចាំបាច់មក គ.ប.ក. សម្រាប់ការត្រួតពិនិត្យនិងវាយតម្លៃ។
• បន្ទាប់ពីការដាក់ឯកសារនិងពត៌មានពេញលេញពីភាគីស្នើសុំវិញ្ញាបនបត្រជាមុន គ.ប.ក. មានរយៈពេលនៃការពិនិត្យការស្នើសុំវិញ្ញាបនបត្រជាមុននឹងមិនលើសពី១២០(មួយរយម្ភៃ)ថ្ងៃនៃថ្ងៃធ្វើការ។
  ១៨. តើច្បាប់ស្ដីពីការប្រកួតប្រជែង មានចែងអំពីការលើកលែងចំពោះបុគ្គលដែលប្រព្រឹត្តល្មើសដែរឬទេ?
  ចម្លើយ៖ បទល្មើសក្រោមច្បាប់ស្ដីពីការប្រកួតប្រជែងអាចត្រូវបានលើកលែង ប្រសិនបើបុគ្គលប្រព្រឹត្តល្មើស អាចធ្វើការធានាអះអាងថាការព្រមព្រៀងឬសកម្មភាពទាំងនោះបានបំពេញតាមលក្ខខណ្ឌចំនួន៤ ដូចខាងក្រោម៖
• ផ្ដល់នូវអត្ថប្រយោជន៍សំខាន់ដោយផ្ទាល់ដល់បច្ចេកវិទ្យា សង្គម ឬសេដ្ឋកិច្ច។
• អត្ថប្រយោជន៍ទាំងនោះអាចនឹងមិនកើតមានឡើង ប្រសិនបើគ្មានការព្រមព្រៀងឬសកម្មភាពដែលត្រូវបានហាមឃាត់ទាំងនោះទេ។
• អត្ថប្រយោជន៍ទាំងនោះមានច្រើនជាងផលប៉ះពាល់ដែលកើតពីការរារាំង រឹតត្បិត ឬបង្ខូចដល់ការប្រកួតប្រជែងគួរឱ្យកត់សម្គាល់។
• មិនលុបបំបាត់ការប្រកួតប្រជែងលើផ្នែកសំខាន់ៗណាមួយរបស់ទំនិញឬសេវា។
  ១៩. តើនៅក្រោមច្បាប់ស្តីពីការប្រកួតប្រជែងនៅកម្ពុជា សហគ្រាសធុនតូច និងមធ្យម (SMEs) អាចទទួលបានអត្ថប្រយោជន៍អ្វីខ្លះ?
  ចម្លើយ៖ តាមរយៈការអនុវត្តច្បាប់ស្ដីពីការប្រកួតប្រជែងប្រកបដោយប្រសិទ្ធភាព សហគ្រាសធុនតូច និងមធ្យម (SMEs) នឹងទទួលបានការការពារពីសកម្មភាពបំពាននានា ដោយបុគ្គលដែលមានជំហរឧត្តមភាពលើទីផ្សារ (ឧទាហរណ៍៖ ការលក់ទំនិញឬសេវាទាបជាងថ្លៃដើមដោយក្រុមហ៊ុនដែលមានអំណាចទីផ្សារ ដែលធ្វើឱ្យសហគ្រាសធុនតូច និងមធ្យម (SMEs) មិនអាចប្រកួតប្រជែងបាន និងត្រូវចាកចេញពីទីផ្សារ)។ ការការពារនេះនឹងធ្វើឱ្យមានកំណើនចំនួនសហគ្រាសធុនតូច និងមធ្យម ដែលនឹងលើកកម្ពស់ការបង្កើតធុរកិច្ចថ្មីៗ និងការច្នៃប្រឌិត ផ្ដល់ជម្រើសសម្រាប់អ្នកប្រើប្រាស់ និងការងារ ដែលអាចជួយកាត់បន្ថយភាពក្រីក្រ និងជំរុញឱ្យសេដ្ឋកិច្ចកាន់តែរីកចម្រើន។
  ២០. តើច្បាប់ស្តីពីការប្រកួតប្រជែងនៅកម្ពុជា ស្របជាមួយនឹងឧត្តមានុវត្តន៌អន្តរជាតិហើយឬនៅ? តើមានកិច្ចព្រមព្រៀងអន្តរជាតិណាដែលប្រទេសកម្ពុជាជាភាគីដៃគូពាក់ព័ន្ធនឹងការប្រកួតប្រជែង?
  ចម្លើយ៖ ច្បាប់ស្តីពីការប្រកួតប្រជែងនៅកម្ពុជា ត្រូវបានរៀបចំឡើងស្របជាមួយនឹងឧត្តមានុវត្តន៌អន្តរជាតិ និងគោលការណ៍ណែនាំក្នុងតំបន់អាស៊ានស្តីពីគោលនយោបាយនិងច្បាប់ស្ដីពីការប្រកួតប្រជែង។ បន្ថែមពីលើនេះទៀតនោះ ប្រទេសកម្ពុជាក៏ជាភាគីនៃកិច្ចព្រមព្រៀងភាពជាដៃគូសេដ្ឋកិច្ចគ្រប់ជ្រុងជ្រោយក្នុងតំបន់ (RCEP) និងជាភាគីនៃកិច្ចព្រមព្រៀងពាណិជ្ជកម្មសេរីអាស៊ាន អូស្រ្តាលី នូវែលសេឡង់ (AANZFTA) ដែលសុទ្ធសឹងតែជាកិច្ចព្រមព្រៀងដែលបានបញ្ចូលនូវជំពូកស្ដីពីការប្រកួតប្រជែងនៅក្នុងកិច្ចព្រមព្រៀងរបស់ខ្លួន។ ប្រទេសកម្ពុជា ក៏កំពុងចរចាលើកិច្ចព្រមព្រៀងក្របខ័ណ្ឌអាស៊ានស្ដីពីកិច្ចការប្រកួតប្រជែង (AFAC)។
  ២១. តើគណៈកម្មាធិការប្រកួតប្រជែងកម្ពុជា «គ.ប.ក.» ឬអគ្គនាយកដ្ឋាន ក.ប.ប. មានយន្តការក្នុងការដោះស្រាយបណ្តឹងដែរឬទេ?
  ចម្លើយ៖ រាល់បុគ្គល ក្រសួង ស្ថាប័ន ឬបញ្ញត្តិករមានសមត្ថកិច្ច ដែលបានដឹង ឬសង្ស័យថាមានការបំពានច្បាប់ស្តីពីការប្រកួតប្រជែង អាចដាក់ពាក្យបណ្តឹងមកអគ្គនាយកដ្ឋាន ក.ប.ប. ដែលជាលេខាធិការដ្ឋានរបស់ គ.ប.ក.។ គ.ប.ក./អគ្គនាយកដ្ឋាន ក.ប.ប. អាចផ្ដួចផ្ដើម និងដោះស្រាយបណ្តឹងដោយខ្លួនឯង លើរាល់ការបំពានច្បាប់ស្តីពីការប្រកួតប្រជែង និងបទប្បញ្ញត្តិពាក់ព័ន្ធ។
  ២២. តើការបំពានច្បាប់ស្ដីពីការប្រកួតប្រជែងត្រូវធ្វើការស៊ើបអង្កេតដោយរបៀបណា?
  ចម្លើយ៖ បន្ទាប់ពីទទួលបានពាក្យបណ្តឹង ឬតាមការផ្ដួចផ្ដើមដោយខ្លួនឯងពាក់ព័ន្ធនឹងការប្រកួតប្រជែង គ.ប.ក. ដែលមានអគ្គនាយកដ្ឋាន ក.ប.ប. ជាសេនាធិការ ត្រូវចាត់តាំងមន្ត្រីស៊ើបអង្កេតឱ្យធ្វើការត្រួតពិនិត្យបឋម និងស៊ើបអង្កេត។ មន្ត្រីស៊ើបអង្កេតនៃអគ្គនាយកដ្ឋាន ក.ប.ប. មានសិទ្ធិសាកសួរ កោះហៅបុគ្គលពាក់ព័ន្ធឱ្យមកបង្ហាញខ្លួន និងស្នើសុំ គ.ប.ក. ចេញវិធានការផ្អាកជាបណ្តោះអាសន្ន និង/ឬសេចក្ដីសម្រេចពាក់ព័ន្ធនឹងការបំពានច្បាប់។
  ២៣. តើបុគ្គលណាខ្លះអាចរាយការណ៍ អំពីការបំពានដែលសិ្ថតក្រោមច្បាប់ស្តីពីការប្រកួតប្រជែង បានដោយរបៀបណា?
  ចម្លើយ៖ បុគ្គលគ្រប់រូប ដែលមានឬមិនមានផលប្រយោជន៍នៅក្នុងឬបង្កើតការព្រមព្រៀងឬសកម្មភាពដែលអាចរារាំង រឹតត្បិត ឬបង្ខូចដល់ការប្រកួតប្រជែង ឬបានដឹងនិងសង្ស័យថាមានការបំពានច្បាប់ស្តីពីការប្រកួតប្រជែង អាចដាក់ពាក្យបណ្តឹង និងផ្ដល់ឯកសារឬភស្តុតាងមក គ.ប.ក. ដែលមានអគ្គនាយកដ្ឋាន ក.ប.ប. ជាសេនាធិការ ដោយផ្ទាល់ ឬតាមរយៈមធ្យោបាយផ្សេងទៀតដូចជា៖
• គេហទំព័រ៖ https://www.ccfdg.gov.kh/en/
• ទំព័រហ្វេសប៊ុក៖ https://web.facebook.com/ccfkh.
• អ៊ីម៉ែល: info@ccfdg.gov.kh
• ទូរស័ព្ទរបស់អគ្គនាយកដ្ឋាន ក.ប.ប. : (+855) 23 231 856 (+855) 92 830 856
• ទូរស័ព្ទរបស់នាយកដ្ឋានកិច្ចការប្រកួតប្រជែង : (+855) 61 238 877
  អត្តសញ្ញាណរបស់បុគ្គលដែលផ្តល់ព័ត៌មានមក គ.ប.ក. ដែលមានអគ្គនាយកដ្ឋាន ក.ប.ប. ជាសេនាធិការ ត្រូវបានរក្សាទុកជាការសម្ងាត់។ លើសពីនេះទៀត ច្បាប់ស្តីពីការប្រកួតប្រជែងនឹងការពារនូវរាល់ព័ត៌មានសម្ងាត់របស់បុគ្គលរាយការណ៍ដោយសុទ្ធចិត្ត ទោះបីការរាយការណ៍នោះមិនឈានដល់ការរកឃើញពីការបំពានច្បាប់ស្ដីពីការប្រកួតប្រជែងក៏ដោយ។

១. តើច្បាប់ស្តីពីសុវត្ថិភាពម្ហូបអាហារមានគោលបំណងអ្វី? និងផ្តល់អត្ថប្រយោជន៍អ្វីខ្លះ?
ចម្លើយ៖
ច្បាប់ស្តីពីសុវត្ថិភាពម្ហូបអាហារ មានសារៈសំខាន់ដើម្បី៖
១- ធានាការពារសុខភាព និងសុវត្ថិភាពអ្នកប្រើប្រាស់ ។
២- ធានារាល់ម្ហូបអាហារទាំងអស់ត្រូវរៀបចំ ផលិត វេចខ្ចប់ ដឹកជញ្ជូន ចែកចាយ រក្សាទុក និងដាក់លក់ មាគុណភាព សុវត្ថិភាព អនាម័យ សមស្របតាមលក្ខខណ្ឌតម្រូវនៃស្តង់ដានិងបទប្បញ្ញត្តិជាតិជាធរមាន ។
៣- ធានាការអនុវត្តធុរកិច្ចម្ហូបអាហារប្រកបដោយស្មោះត្រង់ និងស្មើភាព។

ច្បាប់សុវត្ថិភាពម្ហូបអាហារផ្ដល់អត្ថប្រយោជន៍៖
១- ធានាឱ្យមានការអនុវត្តនូវប្រព័ន្ធផលិតកម្មម្ហូបអាហារ ប្រកបដោយសុវត្ថិភាព
គុណភាព សមស្របតាមស្តង់ដារ និងបទប្បញ្ញត្តិជាធរមាន។
២- កាត់បន្ថយអត្រាបង្កគ្រោះថ្នាក់ចំពោះសុខភាពអ្នកប្រើប្រាស់ឱ្យបានជាអតិបរិមា
ដែលបណ្ដាលមកពីការចម្លងសារធាតុគីមី មីក្រូជីវសាស្រ្ត និងសារធាតុរូបវន្ត។
៣-រួមចំណែកកាត់បន្ថយភាពក្រីក្ររបស់ប្រជាពលរដ្ឋ តាមរយៈការធានាបាននូវការពារសុខភាព និងផលប្រយោជន៍អ្នកប្រើប្រាស់ពីផលិតផលគ្មានសុវត្ថិភាព និងក្លែងបន្លំគុណភាព។
៤- ជំរុញឱ្យមានកំណើនវិនិយោគវិស័យផលិតកម្មម្ហូបអាហារក្នុងប្រទេស ដើម្បីធានាការ នាំចេញម្ហូបអាហារទៅកាន់ទីផ្សាអន្តរជាតិ។
៥- ធានាប្រព័ន្ធត្រួតពិនិត្យម្ហូបអាហារថ្នាក់ជាតិប្រកបដោយប្រសិទ្ធភាព នៅតាមគ្រប់ដំណាក់កាលនៃខ្សែចង្វាក់ផលិតកម្មម្ហូបអាហារ។
ច្បាប់សុវត្ថិភាពម្ហូបអាហារនេះត្រូវបានអនុម័តឱ្យប្រើប្រាស់ នៅថ្ងៃទី ០៨ ខែមិថុនា ឆ្នាំ២០២២។

២. តើស្ថាប័នមានសមត្ថកិច្ចពាក់ព័ន្ធនឹងគុណភាព និងសុវត្ថិភាពម្ហូបអាហារមានភារកិច្ចដូចម្តេចខ្លះដើម្បីធានាគុណភាព និងសុវត្ថិភាពម្ហូបអាហារស្របតាមច្បាប់ស្តីពីសុវត្ថិភាពម្ហូបអាហារ។
ចម្លើយ៖ ក្រសួងពាណិជ្ជកម្មមានភារកិច្ចក្នុងការដឹកនាំ និងសម្របសម្រួលការគ្រប់គ្រងគុណភាព សុវត្ថិភាពដោយសហការជាមួយក្រសួង ស្ថាប័នពាក់ព័ន្ធនឹងគុណភាព សុវត្ថិភាពម្ហូបអាហារ។ ក្នុងនោះត្រូវអនុវត្តដូចខាងក្រោម៖
• ត្រូវរៀបចំបទប្បញ្ញត្តិបច្ចេកទេសស្តីពីគុណភាព សុវត្ថិភាពម្ហូបអាហារ ដូចជា ស្តង់ដារម្ហូបអាហារ ក្រមប្រតិបត្តិ ឬគោលការណ៍ណែនាំ
• ត្រូវកំណត់លក្ខខណ្ឌតម្រូវស្តីពីម្ហូបអាហារដោយយោងលើបទប្បញ្ញត្តិបច្ចេកទេសខាងលើ សម្រាប់ឱ្យប្រតិករអាជីវកម្មម្ហូបអាហារ អនុវត្ត និងគោរពតាម
• ត្រូវធ្វើការត្រួតពិនិត្យគុណភាព សុវត្ថិភាពម្ហូបអាហារដើម្បីធានាថាម្ហូបអាហារទាំងនោះ មានគុណភាព សុវត្ថិភាព និងសមស្របសម្រាប់មនុស្សបរិភោគ អាចធ្វើចរាចរនៅលើទីផ្សារ និងនាំចេញទៅកាន់ទីផ្សារអន្តរជាតិ។
• ត្រូវចេញបទប្បញ្ញត្តិកំហិតបន្ថែម ដើម្បីឆ្លើយតបទៅនឹងស្ថានភាពបន្ទាន់ទាក់ទងនឹងគុណភាព សុវត្ថិភាពម្ហូបអាហារ
• ត្រូវចេញលិខិតអនុញ្ញាតិសម្រាប់ការធ្វើអាជីវកម្មម្ហូបអាហារ ដែលបានអនុលោមតាមលក្ខខណ្ឌតម្រូវស្តីពីម្ហូបអាហារ។
• ត្រូវធ្វើការអង្កេតដាន និងដកហូតអាហារមកវិញ ចំពោះម្ហូបអាហារគ្មានសុវត្ថិភាព ឬមិនអនុលោមតាមបទប្បញ្ញត្តិបច្ចេកទេស។
• ត្រូវបង្កើតនីតិវិធីធ្វើអធិការកិច្ចម្ហូបអាហារដោយផ្អែកលើការសិក្សាវាយតម្លៃហានិភ័យ កំណត់ចំណាត់ថ្នាក់ហានិភ័យ និងកំណត់អាជីវកម្មម្ហូបអាហារទៅតាមគ្រប់ដំណាក់ការនៃខ្សែច្រវាក់ផលិតកម្មម្ហូបអាហារ។
៣. តើប្រតិបត្តិករអាជីវកម្មម្ហូបអាហារ មានកាតព្វកិច្ចចម្បងដូចម្តេចខ្លះ?
ចម្លើយ៖ ប្រតិបត្តិករអាជីវកម្មម្ហូបអាហារមានកាតព្វកិច្ចចម្បងដូចជា៖
• ត្រូវធានាថាម្ហូបអាហារមានសុវត្ថិភាព គុណភាព និងភាពសមស្របសម្រាប់មនុស្សបរិភោគ ស្របតាមលក្ខខណ្ឌតម្រូវស្តីពីម្ហូបអាហារ
• ត្រូវដោះស្រាយបញ្ហាសុវត្ថិភាពម្ហូបអាហារនៅពេលដែលកើតមាននៅក្នុងអាជីវកម្មរបស់ខ្លួន
• ត្រូវជូនដំណឹងជាបន្ទាន់ដល់ក្រសួង ស្ថាប័នពាក់ព័ន្ធនឹងគុណភាព សុវត្ថិភាពម្ហូបអាហារ អំពីបញ្ហាដែលកើតឡើងចំពោះម្ហូបអាហារ
• ត្រូវសហការជាមួយក្រសួង ស្ថាប័នពាក់ព័ន្ធនឹងគុណភាព សុវត្ថិភាពម្ហូបអាហារ ក្នុងការអនុវត្តវិធានការដើម្បីជៀសវាង ឬកាត់បន្ថយហានិភ័យដែលបានបង្កដោយផលិតផលនៃអាជីវកម្មម្ហូបអាហារដែលពាក់ព័ន្ធ ព្រមទាំងការអង្កេតដាន ការប្រមូលម្ហូបអាហារមកវិញ និងការដកហូតម្ហូបអាហារ។
៤. ហេតុអ្វីបានជាប្រតិបត្តិករអាជីវករម្ហូបអាហារត្រូវជូនដំណឹងជាបន្ទាន់ដល់ក្រសួង ស្ថាប័នពាក់ព័ន្ធនឹងគុណភាព សុវត្ថិភាពម្ហូបអាហារ អំពីបញ្ហាដែលកើតឡើងចំពោះម្ហូបអាហាររបស់ខ្លួន?
ចម្លើយ៖ ដើម្បីអនុវត្តវិធានការអង្កេតដាន ការប្រមូលម្ហូបអាហារមកវិញ និងការដកហូតម្ហូបអាហារ ដើម្បីជៀសវាង ឬកាត់បន្ថយហានិភ័យដល់អ្នកប្រើប្រាស់។ ក្នុងករណីប្រតិបត្តិករអាជីវកម្មម្ហូបអាហារ មិនបានជូនដំណឹងដល់ក្រសួង ស្ថាប័នពាក់ព័ន្ធនឹងគុណភាព និងសុវត្ថិភាពម្ហូបអាហារ យោងតាមមាត្រា៣៤ចំណុច(គ) ត្រូវទទួលពិន័យអន្តរការណ៍ចាប់ពី ៥០០ ០០០៛ ដល់ ៨ ០០០ ០០០៛ ។
៥. តើផលិតករ អ្នកកែច្នៃ និងអ្នកវេចខ្ចប់ម្ហូបអាហារ គួរជៀសវាងអ្វីខ្លះ?
ចម្លើយ៖ ផលិតករ អ្នកកែច្នៃ និងអ្នកវេចខ្ចប់ម្ហូបអាហារមិនត្រូវ៖
• ផលិត កែច្នៃ ឬវេចខ្ចប់ម្ហូបអាហារ ពុំមានសុវត្ថិភាព
• ផលិត កែច្នៃ ឬវេចខ្ចប់ម្ហូបអាហារ ឬបន្លំម៉ាក ឬមិនមានដាក់កាលបរិច្ឆេទនៃការផុតកំណត់រយៈពេលប្រើប្រាស់ ឬដាក់ស្លាកសញ្ញាមិនអនុលោមតាមលក្ខខណ្ឌស្តីពីស្លាកសញ្ញាដូចមានចែងក្នុងស្តង់ដារកម្ពុជាស្តីពីការដាក់ស្លាកសញ្ញាម្ហូបអាហារវេចខ្ចប់
• ផលិត កែច្នៃ ឬវេចខ្ចប់ម្ហូបអាហារ ដោយមិនមានបញ្ជាក់អំពីអត្តសញ្ញាណរបស់ផលិតករនៃម្ហូបអាហារ
• រក្សាទុក ឬធ្វើសហត្ថាករណ៍ ឬទុកដាក់ ដោយល្មើសនឹងបទប្បញ្ញត្តិនៃច្បាប់នេះ និងបទប្បញ្ញត្តិនានាដោយកំណត់ដោយក្រសួង ស្ថាប័នពាក់ព័ន្ធនឹងគុណភាព សុវត្ថិភាពម្ហូបអាហារ។
៦. តើអាជីវករលក់ដុំ និងអាជីវករចែកចាយម្ហូបអាហារ មិនត្រូវធ្វើអ្វីខ្លះពាក់ព័ន្ធនឹងគុណភាព និងសុវត្ថិភាពម្ហូបអាហារ?
ចម្លើយ៖ អាជីវករលក់ដុំ និងអាជីវករចែកចាយម្ហូបអាហារ មិនត្រូវ៖
• ផ្គត់ផ្គង់ លក់ដុំ ឬចែកចាយម្ហូបអាហារ ក្រោយកាលបរិច្ឆេទនៃការផុតកំណត់រយៈពេលប្រើប្រាស់
• រក្សាទុក លក់ដុំ ឬចែកចាយម្ហូបអាហារ ដែលផ្ទុយនឹងសេចក្តីណែនាំអំពីសុវត្ថិភាពរបស់ផលិតករ
• ផ្គត់ផ្គង់ លក់ដុំ ឬចែកចាយម្ហូបអាហារពុំមានសុវត្ថិភាព ឬបន្លំម៉ាក
• ផ្គត់ផ្គង់ លក់ដុំ ឬចែកចាយម្ហូបអាហារ ដែលមិនអាចបញ្ជាក់អំពីអត្តសញ្ញាណរបស់ផលិតករនៃម្ហូបអាហារ
• ផ្គត់ផ្គង់ លក់ដុំ ឬចែកចាយម្ហូបអាហារ ដោយដឹងថាពុំមានសុវត្ថិភាព
• រក្សាទុក ឬសហត្ថាករណ៍ ឬទុកដាក់ ដោយល្មើសនឹងបទប្បញ្ញត្តិនៃច្បាប់នេះ និងបទប្បញ្ញត្តិនានាដែលកំណត់ដោយក្រសួង ស្ថាប័នពាក់ព័ន្ធនឹងគុណភាព សុវត្ថិភាពម្ហូបអាហារ។
៧. តើអាជីវករលក់រាយម្ហូបអាហារ មិនត្រូវធ្វើអ្វីខ្លះពាក់ព័ន្ធនឹងគុណភាព និងសុវត្ថិភាពម្ហូបអាហារ?
ចម្លើយ៖ អាជីវករលក់រាយម្ហូបអាហារ មិនត្រូវ៖
• ដាក់លក់ម្ហូបអាហារ ក្រោយកាលបរិច្ឆេទនៃការផុតកំណត់រយៈពេលប្រើប្រាស់
• ធ្វើសហត្ថាករណ៍ ឬទុកដាក់ម្ហូបអាហារក្នុងស្ថានភាពគ្មានអនាម័យ
• ដាក់ស្លាកសញ្ញាគ្រប់ប្រភេទពុំត្រឹមត្រូវ
• ដាក់លក់ម្ហូបអាហារ ដែលមិនអាចបញ្ជាក់អំពីអត្តសញ្ញាណរបស់ផលិតករ និង/ឬអ្នកចែកចាយនៃម្ហូបអាហារ
• លក់ម្ហូបអាហារ ដោយដឹងថាពុំមានសុវត្ថិភាព ឬបន្លំម៉ាក។
៨. ហេតុអ្វីបានជាម្ហូបអាហារដែលវេចខ្ចប់ស្រេចសម្រាប់លក់ត្រូវតែដាក់ស្លាកសញ្ញា ស្របតាមលក្ខខណ្ឌតម្រូវ?
ចម្លើយ៖ បានជាម្ហូបអាហារដែលវេចខ្ចប់ស្រេចសម្រាប់លក់ត្រូវតែដាក់ស្លាកសញ្ញា ស្របតាមលក្ខខណ្ឌតម្រូវ៖
• ស្លាកសញ្ញាជាព័ត៌មាន និងមានសារៈសំខាន់សម្រាប់អ្នកប្រើប្រាស់ក្នុងការសម្រេចចិត្តទិញ ឬមិនទិញផលិតផល។ ឧទាហរណ៍៖ ព័ត៌មានពាក់ព័ន្ធនឹងក្រុមហ៊ុនផលិត ប្រភពផលិត កាលបរិច្ឆេទរយៈពេលប្រើប្រាស់ គ្រឿងផ្សំ អាហារូបត្ថម្ភ វិធីសាស្រ្តប្រើ ឬសារធាតុដែលធ្វើឱ្យ Allergy ដល់អ្នកប្រើប្រាស់ ។ល។
• ស្លាកសញ្ញាជាព័ត៌មានសម្រាប់ស្ថាប័នមានសមត្ថកិច្ចក្នុងការកំណត់អត្តសញ្ញាណផលិតផល និងជួយសម្រួលប្រមូលម្ហូបអាហារត្រឡប់មកវិញ ក្នុងករណីម្ហូបអាហារនោះគ្មានសុវត្ថិភាព ឬមិនអនុលោមតាមបទប្បញ្ញត្តិបច្ចេកទេស។
៩. តើត្រូវធ្វើដូចម្តេចដើម្បីធ្វើការផ្សព្វផ្សាយពាណិជ្ជកម្មម្ហូបអាហារ ស្របតាមលក្ខខណ្ឌតម្រូវ?
ចម្លើយ៖ ដើម្បីធ្វើការផ្សព្វផ្សាយពាណិជ្ជកម្មម្ហូបអាហារ ស្របតាមលក្ខខណ្ឌតម្រូវរួមមាន៖
• ត្រូវធានាថាការផ្សព្វផ្សាយពាណិជ្ជកម្មមិនភូតកុហក បង្វាងការពិត ឬអះអាងណាមួយដែលមិនពិត ការក្លែងបន្លំ ឬការធ្វើឱ្យមានការភាន់ច្រឡំអំពីលក្ខណៈពិតនៃគុណភាពនិងសុវត្ថិភាពម្ហូបអាហារ
• មានលិខិតអនុញ្ញាតិផ្សាយពាណិជ្ជកម្មពីស្ថាប័នពាក់ព័ន្ធ
• មានលិខិតបញ្ជាក់អនុលោមភាពនៃការផ្សាយពាណិជ្ជកម្ម ពីអគ្គនាយកដ្ឋាន ក.ប.ប. នៃក្រសួងពាណិជ្ជកម្ម
១០. តើផលិតផលម្ហូបអាហារដែលនាំចូលត្រូវអនុលោមតាមលក្ខខណ្ឌតម្រូវរបស់ច្បាប់ស្តីពីសុវត្ថិភាពម្ហូបអាហារនេះដែរឬទេ? និងមានតម្រូវការភ្ជាប់ឯកសារអ្វីខ្លះ?
ចម្លើយ៖
• ផលិតផលម្ហូបអាហារដែលនាំចូលត្រូវតែអនុលោមតាមលក្ខខណ្ឌតម្រូវរបស់ច្បាប់ស្តីពីសុវត្ថិភាពម្ហូបអាហារ និងត្រូវភ្ជាប់មកជាមួយនូវវិញ្ញាបនបត្រដែលចេញដោយអាជ្ញាធរមានសមត្ថកិច្ចនៃប្រទេសនាំចេញស្របទៅតាមគោលការណ៍គ្រប់គ្រងហានិភ័យ ដោយអនុលោមតាមច្បាប់និងបទប្បញ្ញត្តិពាក់ព័ន្ធជាធរមាន។
• ក្នុងករណីចាំបាច់ដែលម្ហូបអាហារនាំចូលតម្រូវឱ្យមានការធ្វើវិភាគ ដើម្បីផ្ទៀងផ្ទាត់ភាពអនុលោមតាមលក្ខខណ្ឌតម្រូវស្តីពីម្ហូបអាហារ សំណាកគំរូត្រូវយកមកវិភាគដោយមន្ទីរពិសោធន៍ផ្លូវការ ឬមន្ទីរពិសោធន៍យោង។
១១. តើស្ថាបនមានសមត្ថកិច្ចពាក់ព័ន្ធនឹងគុណភាព សុវត្ថិភាពម្ហូបអាហារ ចាត់វិធានការចំពោះទំនិញម្ហូបអាហារនាំចូលដែលមិនអនុលោមដូចម្តេច?
ចម្លើយ៖ ម្ហូបអាហារនាំចូលដែលមិនអនុលោមតាមច្បាប់នេះ និងបទប្បញ្ញត្តិពាក់ព័ន្ធជាធរមាន ត្រូវសម្រេចចាត់ចែងដូចខាងក្រោម៖
• តម្រូវឱ្យនាំចេញទៅវិញ
• តម្រូវឱ្យកែច្នៃជាថ្មី រួមទាំងការដាក់ស្លាកសញ្ញាជាថ្មី និងបញ្ជូនទៅធ្វើការត្រួតពិនិត្យជាផ្លូវការម្តងទៀត
• កម្ទេចចោល
សំគាល់៖ រាល់ការចំណាក់ពាក់ព័ន្ធជាបន្ទុករបស់អ្នកនាំចូល។
១២. តើអគ្គនាយកដ្ឋាន ក.ប.ប. នឹងចាត់វិធានការចំពោះទំនិញម្ហូបអាហារចរាចរលើទីផ្សារដែលមិនអនុលោមដូចម្តេច?
ចម្លើយ៖ អគ្គនាយកដ្ឋាន ក.ប.ប. នឹងចាត់វិធានការចំពោះទំនិញម្ហូបអាហារចរាចរលើទីផ្សារដែលមិនអនុលោមដូចខាងក្រោម៖
• ឱ្យធ្វើការកែតម្រូវឡើងវិញ
• តម្រូវឱ្យកែច្នៃសារជាថ្មី
• រឹបអូសនិងកម្ទេចចោល ក្នុងករណីដែលមិនអាចកែតម្រូវឬកែច្នៃសាជាថ្មីបាន
សំគាល់៖ រាល់ការចំណាយពាក់ព័ន្ធជាបន្ទុករបស់ម្ចាស់ម្ហូបអាហារ។
១៣. តើម្ហូបអាហារនាំចូលត្រូវបំពេញលក្ខខណ្ឌអ្វីខ្លះ?
ចម្លើយ៖ ម្ហូបអាហារនាំចេញត្រូវបំពេញលក្ខខណ្ឌតម្រូវនានារបស់ប្រទេសនាំចូលស្របតាមកិច្ចព្រមព្រៀងពុហុភាគី តំបន់ និងទ្វេភាគី ដែលព្រះរាជាណាចក្រកម្ពុជាជារដ្ឋភាគី។
១៤. តើទណ្ឌកម្មនៅក្នុងច្បាប់ស្តីពីសុវត្ថិភាពម្ហូបអាហារមានអ្វីខ្លះ?
ចម្លើយ៖ ទណ្ឌកម្មនៅក្នុងច្បាប់ស្តីពីសុវត្ថិភាពម្ហូបអាហាររួមមានទណ្ឌកម្មរដ្ឋបាល និងទណ្ឌកម្មព្រហ្មទណ្ឌ៖
• ទណ្ឌកម្មរដ្ឋបាល៖ ការព្រមានជាលាយលក្ខណ៍អក្សរ ការព្យួរ ឬដកហូតលិខិតអនុញ្ញាតិ វិញ្ញាបនបត្រ ឬអាជ្ញាបណ្ណ ការបិទអាជីវកម្ម
• ទណ្ឌកម្មព្រហ្មទណ្ឌ៖ ពិន័យអន្តរការណ៍ ពិន័យជាប្រាក់ ទោសដាក់ពន្ធនាគារ។
១៥. តើប្រតិបត្តិករអាជីវកម្មម្ហូបអាហារត្រូវរងការពិន័យអន្តរការណ៍ដូចម្តេចចំពោះ៖
• ដំណើរការអាជីវកម្មម្ហូបអាហារដោយគ្មានលិខិតអនុញ្ញាត
• រៀបចំ ស្តុកទុក ធ្វើសហត្ថាករណ៍ ឬលក់ម្ហូបអាហារខ្វះអនាម័យ
• មិនបានជូនដំណឹងបន្ទាន់ដល់ក្រសួង ស្ថាប័នពាក់ព័ន្ធគុណភាព សុវត្ថិភាពម្ហូបអាហារអំពីបញ្ហាដែលកើតឡើងចំពោះម្ហូបអាហារ
• មិនបានបង្កើត ឬអនុវត្តប្រព័ន្ធដែលអាចអង្កេតដាន
• ផលិត កែច្នៃ ឬវេចខ្ចប់ម្ហូបអាហារដោយមិនបញ្ជាក់អំពីអត្តសញ្ញាណផលិតករ និង/ឬអ្នកចែកចាយម្ហូបអាហារ
• ផលិត កែច្នៃ ឬវេចខ្ចប់ម្ហូបអាហារដែលមិនមានដាក់កាលបរិច្ឆេទនៃការផុតកំណត់រយៈពេលប្រើប្រាស់
• ផ្គត់ផ្គង់ លក់ដុំ ចែកចាយ ឬដាក់លក់ម្ហូបអាហារក្រោយកាលបរិច្ឆេទនៃការផុតកំណត់រយៈពេលប្រើប្រាស់
• មិនបានគោរពតាមវិធានអនាម័យ ដែលត្រូវកំណត់ដោយក្រសួង ស្ថាប័នពាក់ព័ន្ធនឹងគុណភាព សុវត្ថិភាពម្ហូបអាហារ
• មិនបានផ្តល់ព័ត៌មានអំពីខ្លឹមសារដែលបញ្ជាក់ពីគុណភាព សុវត្ថិភាពនៃម្ហូបអាហារដែលនឹងត្រូវផ្សាយដំណឹងពាណិជ្ជកម្ម
• មិនបានគោរពតាមការណែនាំ និងការកែតម្រូវរបស់មន្រ្តីអធិការកិច្ចម្ហូបអាហារ
ចម្លើយ៖ ប្រតិបត្តិករអាជីវកម្មម្ហូបអាហារដែលបំពានលក្ខខណ្ឌតម្រូវទាំង ១០ ខាងលើត្រូវរងការពិន័យអន្តរការណ៍៖
• ផាកពិន័យលើកទី១៖ ៥០០ ០០០៛ ដល់ ៨ ០០០ ០០០៛
• ផាកពិន័យលើកទី២៖ ទ្វេដងនៃប្រាក់ពិន័យលើកទី១
១៦. តើប្រតិបត្តិករអាជីវកម្មម្ហូបអាហារត្រូវរងការពិន័យអន្តរការណ៍ដូចម្តេចចំពោះការមិនអនុវត្តតាមលក្ខខណ្ឌតម្រូវស្តីពីម្ហូបអាហារដែលបញ្ញត្តិក្នុងមាត្រា៦៖
• ម្ហូបអាហារត្រូវមានសុវត្ថិភាព គុណភាព និងភាពសមស្របសម្រាប់មនុស្សបរិភោគ
• ម្ហូបអាហារមិនត្រូវបាននាំចូល ផលិត កែច្នៃ ឬលក់ ក្នុងលក្ខណៈក្លែងបន្លំឬបំភាន់
• អ្នកប្រើប្រាស់បានទទួលព័ត៌មានគ្រប់គ្រាន់អំពីម្ហូបអាហារ ដូចជាប្រភពដើម គ្រឿងផ្សំ តម្លៃ អាហារូបត្ថម្ភ និងចំនួនកាឡូរី របៀបប្រើប្រាស់ និងការរក្សាទុក
• ម្ហូបអាហារត្រូវបំពេញតាមលក្ខខណ្ឌអនាម័យ ការវេចខ្ចប់ និងការដាក់ស្លាកសញ្ញា
• ម្ហូបអាហារដែលបានចាត់ថាជាប្រភេទមានហានិភ័យខ្ពស់ ត្រូវបញ្ជិកាឱ្យបានត្រឹមត្រូវ
• ការស្តុកទុក និងទីតាំងម្ហូបអាហារ ត្រូវបំពេញតាមលក្ខខណ្ឌសម្រាប់ការរក្សាសុវត្ថិភាព និងគុណភាពរបស់អាហារ។
ចម្លើយ៖ ប្រតិបត្តិករអាជីវកម្មម្ហូបអាហារដែលបំពានលក្ខខណ្ឌតម្រូវទាំង ៦ ខាងលើត្រូវរងការពិន័យអន្តរការណ៍៖
• ផាកពិន័យលើកទី១៖ ២ ០០០ ០០០៛ ដល់ ២០ ០០០ ០០០៛
• ផាកពិន័យលើកទី២៖ ទ្វេដងនៃប្រាក់ពិន័យលើកទី១
១៧. តើប្រតិបត្តិករអាជីវកម្មម្ហូបអាហារត្រូវរងការពិន័យអន្តរការណ៍ដូចម្តេចចំពោះការដែលផ្សាយពាណិជ្ជកម្មដែលមិនពិត ឬធ្វើឱ្យយល់ខុស ឬធ្វើឱ្យមានការភាន់ច្រឡំអំពីលក្ខណៈពិតនៃម្ហូបអាហារ។
ចម្លើយ៖ ប្រតិបត្តិករអាជីវកម្មម្ហូបអាហារដែលបំពានលក្ខខណ្ឌតម្រូវនេះត្រូវរងការពិន័យអន្តរការណ៍៖
• ផាកពិន័យលើកទី១៖ ៥ ០០០ ០០០៛ ដល់ ១០ ០០០ ០០០៛
• ផាកពិន័យលើកទី២៖ ទ្វេដងនៃប្រាក់ពិន័យលើកទី១
១៨. តើប្រតិបត្តិករអាជីវកម្មម្ហូបអាហារត្រូវរងការពិន័យអន្តរការណ៍ដូចម្តេចចំពោះការដែលដាក់ស្លាកសញ្ញាម្ហូបអាហារដែលមានលក្ខណៈមិនពិតធ្វើឱ្យយល់ខុស ឬក្លែងបន្លំ អំពីលក្ខណៈពិតនៃម្ហូបអាហារ។
ចម្លើយ៖ ប្រតិបត្តិករអាជីវកម្មម្ហូបអាហារដែលបំពានលក្ខខណ្ឌតម្រូវនេះត្រូវរងការពិន័យអន្តរការណ៍៖
• ផាកពិន័យលើកទី១៖ ១០ ០០០ ០០០៛ ដល់ ២០ ០០០ ០០០៛
• ផាកពិន័យលើកទី២៖ ទ្វេដងនៃប្រាក់ពិន័យលើកទី១
១៩. តើប្រតិបត្តិករអាជីវកម្មម្ហូបអាហារត្រូវរងការពិន័យអន្តរការណ៍ និងព្រហ្មទណ្ឌដូចម្តេចចំពោះអំពើផលិត កែច្នៃ វេចខ្ចប់ ចែកចាយ ឬលក់ម្ហូបអាហារដោយដឹងថាម្ហូបអាហារនោះមានផ្ទុកនូវសារធាតុពុល ឬសារធាតុបង្កគ្រោះថ្នាក់ដែលលើសកម្រិតអនុញ្ញាតដែលនាំឱ្យខូចសុខភាពដល់មនុស្ស។
ចម្លើយ៖ ប្រតិបត្តិករអាជីវកម្មម្ហូបអាហារដែលបំពានលក្ខខណ្ឌតម្រូវនេះត្រូវរងការពិន័យអន្តរការណ៍ និងព្រហ្មទណ្ឌ៖
• ផាកពិន័យជាប្រាក់៖ ២០០ ០០០ ០០០៛ ដល់ ៤០០ ០០០ ០០០៛
• ផ្តន្ទាទោសដាក់ពន្ធនាគារពី ២ឆ្នាំ ដល់ ៥ឆ្នាំ
២០. តើប្រតិបត្តិករអាជីវកម្មម្ហូបអាហារត្រូវរងនូវទណ្ឌកម្មព្រហ្មទណ្ឌដូចម្តេចចំពោះអំពើផលិត កែច្នៃ វេចខ្ចប់ ចែកចាយ ឬលក់ម្ហូបអាហារដោយដឹងថាម្ហូបអាហារនោះមានផ្ទុកនូវសារធាតុពុល ឬសារធាតុបង្កគ្រោះថ្នាក់ដែលលើសកម្រិតអនុញ្ញាតដែលបង្កឱ្យប៉ះពាល់ធ្ងន់ធ្ងរដល់សុខភាព និងសុវត្ថិភាពអ្នកប្រើប្រាស់។
ចម្លើយ៖ ប្រតិបត្តិករអាជីវកម្មម្ហូបអាហារដែលបំពានលក្ខខណ្ឌតម្រូវនេះត្រូវរងទណ្ឌកម្មព្រហ្មទណ្ឌ ដោយផ្តន្ទាទោសដាក់ពន្ធនាគារពី ៥ឆ្នាំ ដល់ ១០ឆ្នាំ។
២១. តើប្រតិបត្តិករអាជីវកម្មម្ហូបអាហារត្រូវរងនូវទណ្ឌកម្មព្រហ្មទណ្ឌដូចម្តេចចំពោះអំពើផលិត កែច្នៃ វេចខ្ចប់ ចែកចាយ ឬលក់ម្ហូបអាហារដោយដឹងថាម្ហូបអាហារនោះមានផ្ទុកនូវសារធាតុពុល ឬសារធាតុបង្កគ្រោះថ្នាក់ដែលលើសកម្រិតអនុញ្ញាតដែលបង្កឱ្យមានពិការភាពអចិន្រ្តៃយ៍ ឬបាត់បង់អាយុជីវិតរបស់អ្នកប្រើប្រាស់។
ចម្លើយ៖ ប្រតិបត្តិករអាជីវកម្មម្ហូបអាហារដែលបំពានលក្ខខណ្ឌតម្រូវនេះត្រូវរងទណ្ឌកម្មព្រហ្មទណ្ឌ ដោយផ្តន្ទាទោសដាក់ពន្ធនាគារពី ៧ឆ្នាំ ដល់ ១៥ឆ្នាំ។

១. អ្វីទៅជាហាឡាល?

ចម្លើយ៖ ហាឡាល សំដៅដល់វត្ថុ ឬសេវាកម្មដែលអនុញ្ញាតឱ្យប្រើប្រាស់ ដោយ​អាស្រ័យ​ទៅតាមច្បាប់ឥស្លាម។

២.  អ្វីទៅជាហារ៉ាម? ណាជីស?

ចម្លើយ៖

• ហារ៉ាម មានន័យថា អ្វីដែល​ផ្ទុយ​នឹង​ហាឡាល។
• ណាជីស មានន័យថាកខ្វក់ ភាពស្មោគគ្រោក។

៣.  តើអ្វីទៅជាផលិតផលហាឡាល? មានប៉ុន្មានប្រភេទ? តើផលិតផល​ហាឡាល​នៅកម្ពុជា​មាន​អ្វីខ្លះ?

ចម្លើយ៖

• ផលិតផលហាឡាល សំដៅដល់ផលិតផលដែលកើតឡើងដោយខ្លួនឯងតាមធម្មជាតិ ឬត្រូវ​​​បាន​ផលិត​ឡើង​តាមបច្ចេកទេសស្ដង់ដារនៃផលិតផលហាឡាលដែល​មិន​ផ្ទុយ​នឹង​បញ្ញត្តិ​របស់​សាសនា​​ឥស្លាម។
• ផលិតផលហាឡាលមានដូចជា ម្ហូបអាហារ សាច់ គ្រឿងសម្អាង ផលិតផល​​ថែរក្សាខ្លួន ឱសថ អាហារ​បំប៉ន​​​ គ្រឿងផ្សំម្ហូបអាហារ និងសម្ភារប្រើ​ប្រាស់​ផ្សេងៗ​​​ទៀត។ នៅប្រទេសកម្ពុជា មានផលិតផល ហាឡាល​ដូចជា​៖ ផលិតផលម្ហូបអាហារ ផលិតផលភេសជ្ជៈ ផលិតកម្មសាច់(សត្តឃាតដ្ឋាន) គ្រឿងសម្អាង សម្ភារឬផលិតផលប្រើប្រាស់ ផលិតផល​​​​​កសិកម្ម​(មិន​​ទាន់កែច្នៃ និងកែច្នៃរួច)  ទេសចរណ៍និងសេវាកម្ម។

៤.  តើកិច្ចការហាឡាលនៅកម្ពុជាបង្កើតឡើងយ៉ាងដូចម្ដេច?

ចម្លើយ៖ កិច្ចការហាឡាលនៅកម្ពុជា បានបង្កើតឡើងជាផ្លូវការក្នុងឆ្នាំ២០១៦ ដែលមានអនុក្រឹត្យលេខ១៦០ ស្ដីពី ការរៀបចំ​ និងការ​ប្រព្រឹត្តទៅនៃគណៈកម្មាធិការត្រួតពិនិត្យផលិតផលហាឡាលកម្ពុជា «គ.ត.ផ.​ហ.ក.» ដែលមាន​រដ្ឋមន្រ្តីក្រសួង​ពាណិជ្ជកម្ម​​​​ជា​ប្រធាន និងមានបណ្ដាក្រសួងមួយចំនួនជាសមាជិក ព្រម​​ទាំង​មានក្រុម​ឯកទេស​​​ផលិតផល​​​ហាឡាល និងលេខាធិការដ្ឋាននៃ គ.ត.ផ.ហ.ក. ជា​សេនា​ធិការ​។

៥.  តើការដាក់ស្លាកសញ្ញាហាឡាលមានអត្ថប្រយោជន៍អ្វីខ្លះ?

ចម្លើយ៖ ការដាក់ស្លាកសញ្ញាហាឡាលមានអត្ថប្រយោជន៍ដូចជា៖

• បង្កើនតម្រូវការ និងការប្រើប្រាស់ផលិតផលហាឡាលក្នុងខឿនសេដ្ឋកិច្ច
• ការលក់ដែលបានមកពីផលិតផលហាឡាលនឹងកើនឡើង
• អ្នកមិនមែនសាសនិកឥស្លាម​ក៏មានតម្រូវការផលិតផលហាឡាលដែរ ដោយសារផលិតផល ហាឡាលជាផលិតផលសម្រាប់អ្នកប្រើប្រាស់ទូទៅ
• ការដោះដូរពាណិជ្ជកម្មក៏កាន់តែសកម្ម និងសម្បូរបែបកើនឡើងតាមរយៈទំនុកចិត្តលើផលិតផល ហាឡាលពីអ្នកប្រើប្រាស់ដែលជាសាសនិកឥស្លាមមានប្រជាជនច្រើនដូចជា ប្រទេសម៉ាឡេស៊ី ប្រទេសតួកគី ប្រទេសឥណ្ឌូនេស៊ី ប្រទេសអារ៉ាប៊ីសាអ៊ូឌីត ប្រទេសឥណ្ឌា។ល។

៦.    តើស្លាកសញ្ញាហាឡាលកម្ពុជា ដែលប្រើប្រាស់ជាផ្លូវការមានរូបរាងដូចម្ដេច?

ចម្លើយ៖ ស្លាកសញ្ញាហាឡាលកម្ពុជា ដែលប្រើប្រាស់ជាផ្លូវការមានរូបរាងដូចមាននៅក្នុងឧបសម្ព័ន្ធនៃ ប្រកាស លេខ ០៨៩ ព.ណ​.អ.កបប.​ប្រក​ ស្ដីពីស្លាកសញ្ញាហាឡាលកម្ពុជា។

• ជាទូទៅស្លាកសញ្ញានេះ ត្រូវបានប្រើប្រាស់នៅលើសម្បកវេចខ្ចប់ផលិតផល នៅខាងមុ​ខ​ហាង​ឬលើ​ស្លាក​យីហោ និងសេវាកម្មផ្សេងៗ។

៧.    ហេតុអ្វីបានជាត្រូវដាក់ពាក្យស្នើសុំប្រើប្រាស់ស្លាកសញ្ញាហាឡាលកម្ពុជា?

ចម្លើយ៖ បានជាត្រូវដាក់ពាក្យស្នើសុំប្រើប្រាស់ស្លាកសញ្ញាហាឡាលកម្ពុជា គឺដើម្បីធានាឱ្យ​បាន​នូវ​ផលិតផល​​ហាឡាល​ដែលមានការទទួលស្គាល់ត្រឹមត្រូវពី គ.ត.ផ.ហ.ក. និងអាចផ្គត់ផ្គង់​ឱ្យ​ទីផ្សារក្នុងស្រុក និងក្រៅស្រុកដែលត្រូវការផលិតផលហាឡាល។

៨.    តើការប្រើប្រាស់ស្លាកសញ្ញាហាឡាលកម្ពុជាជាបញ្ញត្តិបញ្ជាដែរឬទេ?

ចម្លើយ៖ ជាគោលការណ៍ស្ម័គ្រចិត្ត ប៉ុន្តែប្រសិនក្នុងករណីប្រើប្រាស់ស្លាកសញ្ញាហាឡាលកម្ពុជាគឺ​តម្រូវ​ឱ្យគោរព​ តាមលក្ខខណ្ឌតម្រូវឱ្យបានត្រឹមត្រូវ និងមានវិញ្ញាបនបត្របញ្ជាក់បច្ចេកទេសស្តង់ដារផលិតផល ហាឡាលកម្ពុជា។

៩.  តើស្លាកសញ្ញាហាឡាលរបស់ប្រទេសនីមួយៗមានរូបរាងដូចគ្នាឬទេ?

១០.  តើការដាក់ពាក្យស្នើសុំប្រើប្រាស់ស្លាកសញ្ញាហាឡាលកម្ពុជា អាចដាក់នៅតាមបណ្ដាច្រក​ចេញ​ចូល​តែមួយ​របស់រាជធានី ខេត្ត ឬមន្ទីរពាណិជ្ជកម្មរាជធានី ខេត្ត ឬសាខា ក.ប.ប. រាជធានីខេត្ត បាន​ដែរ​ឬទេ​​?​

ចម្លើយ៖ ការដាក់​ពាក្យស្នើសុំប្រើប្រាស់ស្លាកសញ្ញាហាឡាលកម្ពុជា មានតែនៅនាយកដ្ឋានកិច្ចការហាឡាល នៃអគ្គ​នាយកដ្ឋា​​ន​ ក.ប.ប. តែមួយគត់ និងទំនាក់​ទំនង​ព័ត៌មាន​បន្ថែម​​តាម​​​រយៈលេខទូរស័ព្ទ 0៧១ ៩៦៩ ៣៣៦៣។

១១.  ប្រសិនបើមានបំណងចង់ដាក់ស្លាកសញ្ញាហាឡាលកម្ពុជា តើអាចទៅដាក់ពា​ក្យ​នៅទី​កន្លែង​ណា​?

ចម្លើយ៖ នាយកដ្ឋានកិច្ចការហាឡាល ដែលជាលេខាធិការដ្ឋាន នៃគ.ត.ហ.ផ.ក. ជាកន្លែងដាក់​ពាក្យស្នើ​សុំ​តែ​មួយ​គត់ ដែល​ស្ថិតនៅទីតាំងស្នាក់ការកណ្ដាលនៃអគ្គនាយកដ្ឋាន ក.ប.ប. នៃ​ក្រសួង​ពាណិជ្ជកម្ម​ និង​មាន​លេខ​ទូរស័ព្ទទំនាក់ទំនង៖ 0៧១ ៩៦៩ ៣៣៦៣។

១២.  តើការដាក់ពាក្យស្នើសុំត្រូវការឯកសារភ្ជាប់អ្វីខ្លះ?

ចម្លើយ៖

• ពាក្យស្នើសុំ
• ច្បាប់ចម្លង ប្រវត្តិក្រុមហ៊ុន រចនាសម្ព័ន្ធ
• ច្បាប់ចម្លង ស្លាកសញ្ញារបស់ក្រុមហ៊ុន/សហគ្រាស/អាជីវកម្ម
• ច្បាប់ចម្លង វិញ្ញាបនបត្រចុះបញ្ជីអាជីវកម្ម (លិខិតរបស់ក្រសួងពាណិជ្ជកម្ម)
• ច្បាប់ចម្លង លិខិតអនុញ្ញាតប្រកបអាជីវកម្មតាមវិស័យ (លិខិតអនុញ្ញាតរបស់បណ្ដា​ក្រសួង​ពាក់ព័ន្ធ​​នឹងការបើកអាជីវកម្ម ឧ. មកពីក្រសួងឧស្សាកម្ម ក្រសួងកសិកម្ម ក្រសួងសុខាភិបាល ក្រសួង​​ទេសចរណ៍ ក្រសួងសេដ្ឋកិច្ចនិងហិរញ្ញវត្ថុ...)
• ច្បាប់ចម្លង ប័ណ្ណពន្ធប៉ាតង់ឆ្នាំចុងក្រោយ/ ពន្ធអាករលើតម្លៃបន្ថែម
• ច្បាប់ចម្លង វិញ្ញាបនបត្រហាឡាលដែលធ្លាប់មាន
• ច្បាប់ចម្លង វិញ្ញាបនបត្របញ្ជាក់ស្ដង់ដារ និងគុណភាពដទៃទៀត (HACCP, ISO, GHP, GMP. TQM, ISC…)
• ច្បាប់ចម្លង អត្តសញ្ញាណប័ណ្ណ ឬលិខិតឆ្លងដែនរបស់អ្នកស្នើសុំ និងម្ចាស់អាជីវកម្ម
• សំណាកគម្រូផលិតផល ឬរូបភាពសម្បកវេចខ្ចប់ ឬស្លាកយីហោមុខហាង
• រូបថត ៤*៦ របស់អ្នកស្នើសុំ និងម្ចាស់អាជីវកម្ម ចំនួន៣សន្លឹកផ្ទៃស​​
• សៀវភៅបន្ទុក ឬព័ត៌មានស្ដីពីគ្រឿងផ្សំទាំងឡាយណាដែលពាក់ព័ន្ធ(សូមភ្ជាប់វិញ្ញាបនបត្រ​ហាឡាល និង/ឬវិញ្ញាបនបត្រដែលពាក់ព័ន្ធ)
• បរិយាយពីសារធាតុគីមីបន្ថែមដែលប្រើប្រាស់(សូមភ្ជាប់វិញ្ញាបនបត្រដែលពាក់ព័ន្ធ បើមាន)
• ព័ត៌មានលំហូរផលិតកម្ម
• នីតិវិធីនៃការកែច្នៃនិងផលិតកម្ម
• រូបភាពផលិតផល រូបភាពចង្វាក់ផលិតកម្ម រូបភាពទីតាំងផលិត និងផែនទី។

១៣.  តើដំណើរការនៃការផ្ដល់វិញ្ញាបនបត្របញ្ជាក់បច្ចេកទេសស្ដង់ដារ​ផលិតផលហាឡាលកម្ពុជាត្រូវការ​រយៈពេលប៉ុន្មានថ្ងៃ?

ចម្លើយ៖ យោងតាមប្រកាសលេខ១៣៤ ព.ណ.អ. កបប.ប្រក ស្ដីពីការដាក់ពាក្យស្នើសុំវិញ្ញាបនបត្រ​បញ្ជាក់​បច្ចេកទេស​ស្ដង់ដារ​ផលិតផលហាឡាលកម្ពុជា ការដាក់ពាក្យស្នើ​សុំ​វិញ្ញាបនបត្រ​ត្រូវ​ប្រើប្រាស់​រយៈពេល ៩០ថ្ងៃ គិតចាប់ពី​ថ្ងៃដាក់​ពាក្យ​នៅនាយកដ្ឋាន​កិច្ច​ការ​ហាឡាល។

១៤.  តើវិញ្ញាបនបត្រស្លាកសញ្ញាហាឡាលកម្ពុជាមានសុពលភាពរយៈពេល​ប៉ុន្នានឆ្នាំ?

ចម្លើយ៖ វិញ្ញាបនបត្របញ្ជាក់បច្ចេកទេសស្ដង់ដារ​ផលិតផល​​​ហាឡាលកម្ពុជា មានសុពលភាព១ឆ្នាំ និងត្រូវបន្ត​សុពល​ភាពថ្មី​ជារៀងរាល់ឆ្នាំ។  ក្នុងករណីមិនបន្តសុពលភាពត្រូវជូនដំណឹងមក លេខាធិការ​ដ្ឋាន​នៃ​គ.ត.ផ.ហ.ក.។

១៥.  តើមានកម្រៃសេវាសាធារណៈលើការដាក់ពាក្យស្នើសុំឬទេ?

ចម្លើយ៖ យោងតាមប្រកាសអន្តក្រសួងលេខ ១០៩ សហវ.ប្រក.អទច ស្ដីពីការផ្ដល់សេវាសាធារណៈរបស់ ក្រសួងពាណិជ្ជកម្មលើការគ្រប់គ្រងផលិតផលហាឡាល

• ការដាក់ពាក្យស្នើសុំ ៦០,០០០រៀល
• ការចុះត្រួតពិនិត្យ គិតតាមទំហំអាជីវកម្ម (ពន្ធតូច ១,០០០,០០០រៀល ពន្ធមធ្យម​ ១,៥០០,០០០រៀល និងពន្ធធំ ២,០០០,០០០រៀល)
• ផ្ដល់វិញ្ញាបនបត្របញ្ជាក់បច្ចេកទេសស្ដង់ដាផលិតផលហាឡាលកម្ពុជា ១០០,០០០រៀល
• អនុញ្ញាតឱ្យប្រើប្រាស់ស្លាកសញ្ញាហាឡាល គិតតាមប្រភេទផលិតផល(១មុខ* ៥០,០០០រៀល)។

១៦.  តើបងប្អូនជាសាសនិកឥស្លាម អាចប្រើប្រាស់ស្លាកសញ្ញាហាឡាលដោយ​មិនចាំបាច់​ស្នើសុំ​បាន​ដែរ​ឬទេ?​​

ចម្លើយ៖ មិនបានទេ! ត្រូវតែធ្វើការដាក់ពាក្យស្នើសុំនៅលេខាធិការដ្ឋាននៃគ.ត.ផ.ហ.ក.។

១៧.  តើវិញ្ញាបនបត្រ និងស្លាកសញ្ញាហាឡាលកម្ពុជាមានវិសាលភាពកម្រិតណា?

ចម្លើយ៖ វិញ្ញា​បនបត្រ និងស្លាកសញ្ញាហាឡាលកម្ពុជា មាន​វិសាលភាព​អាច​ចរាចរ​ក្នុងប្រ​ទេស​កម្ពុជា​បាន និង​អាច​​នាំ​​​​​ចេញ​​​ទៅកាន់​អន្តរជាតិ​​បាន។

១៨.  តើផលិតផលនាំចូលទាំងអស់ដែលមានស្លាកសញ្ញាហាឡាលត្រូវដាក់ពាក្យស្នើសុំដែរឬទេ?

ចម្លើយ៖ យោងតាមប្រកាសលេខ១២៧ ព.ណ.អ.កបប.ប្រក ស្ដីពីបែបបទ និង​នីតិវិធី​នៃ​ការ​ដាក់​ពាក្យ​ស្នើ​សុំ​ចុះ​បញ្ជី និងបញ្ជាក់ភាពត្រឹមត្រូវលើកាប្រើប្រាស់ស្លាក​សញ្ញា​ហាឡាល​នាំចូល។ ផលិត​ផល​នាំ​ចូល​ទាំង​​អស់​ដែលមានស្លាកសញ្ញាហាឡាល ត្រូវដាក់ពាក្យស្នើសុំចុះបញ្ជី និងបញ្ជាក់​ភាព​​ត្រឹម​ត្រូវ​លើការ​ប្រើប្រាស់​ស្លាកសញ្ញាហាឡាល សម្រាប់ផលិតផលហាឡាលនាំចូល នៅនាយកដ្ឋាន​កិច្ចការ​ហា​ឡាល ក្នុង​គោលបំណងការពារអំពើក្លែង​បន្លំភាពមិនសុចរិត និងលើក​កម្ពស់​ជំនឿ​ទុកចិត្ត​ពី​សាសនិក​ឥស្លាម និងអ្នកប្រើប្រាស់ទូទៅនៅក្នុងព្រះរាជាណាចក្រកម្ពុជា។

១៩.  ប្រសិនបើមានការសង្ស័យ លើស្លាកសញ្ញាហាឡាលមិនប្រក្រតី តើគួរ​ទំនាក់​ទំនង​ទៅ​​ខាងណា?​

ចម្លើយ៖ ប្រសិនបើមានការសង្ស័យលើការប្រើប្រាស់ស្លាកសញ្ញាហាឡាលមិនប្រក្រតី សូមធ្វើការទំនាក់ទំនង មកកាន់​នាយកដ្ឋាន​កិច្ចការ​​​ហាឡាល នៃអគ្គនាយកដ្ឋាន ក.ប.ប. នៃក្រសួងពាណិជ្ជកម្ម ឬតាម​​​លេខ​ទូរស័ព្ទ​ 0៧១ ៩៦៩ ៣៣៦៣។

២០.  ការប្រើប្រាស់ស្លាកសញ្ញាហាឡាលដោយមិនបានស្នើសុំវិញ្ញាបនបត្របញ្ជាក់បច្ចេកទេសស្ដង់ដារ​ផលិត​ផល​ហាឡាលកម្ពុជា​ តើមានវិធានការដូចម្ដេច?​​​

ចម្លើយ៖ អាជីវកម្មដែលប្រើប្រាស់ស្លាកសញ្ញាហាឡាល ដោយមិនមានវិញ្ញាបនបត្រជាអំពើល្មើសច្បាប់។